Die Hollywood-sterre is in Augustus in Frankryk getroud en maak saam ses kinders groot. Maar ’n besige gesinslewe is nie genoeg nie; hulle werk ook nou saam aan die fliek By the Sea. Hulle speel albei in die fliek, terwyl Angelina ook die regisseur is.

“Sy is lekker streng!” het Brad grappenderwys aan die Duitse tydskrif TV Movie gesê. “Maar sy weet wat sy doen en doen dit baie goed.”

Hul rooster en werkplek is eenders; dit is ’n seëning vir die besige ouers. Hulle het dit in die verlede gemaak werk, soos toe Brad aan Fury skiet en Angelina aan Unbroken, maar dit was nie maklik nie.

Om die las te verlig het hulle die kroos onder hulle verdeel.

“Ek wil nie dit weer deurmaak nie,” het hy gebieg. “’n Gesin met ses kinders werk net beter wanneer een ouer hulle glad nie oor werk hoef te bekommer nie.”

Al het hulle toe aan verskillende projekte gewerk, het dit een ding gemeen gehad – ’n oorlogstema. Om hulle daarop voor te berei het die paartjie alle elektroniese kommunikasiemiddele vermy.

“Albei flieks speel tydens die Tweede Wêreldoorlog af,” het Brad verduidelik.

“Ons het toe besluit om met briewe te kommunikeer. Jy kommunikeer anders wanneer jy so lank op ’n antwoord wag. Dit het ons baie geleer.”

Daar was voor hul troue groot afwagting en aanhangers was in die wolke toe hulle eindelik die knoop deurhak. Al die kinders was betrokke by die groot dag; hulle het die troubeloftes help skryf en het hul ma se sluier versier.

“Tot my verbasing het ons band en toewyding tot mekaar nog dieper geword,” het Brad oor die getroude lewe gesê.

© Cover Media