Hy kon sy oë nie glo nie. Kan daai klein ‘‘boontjie’’ op die sonarskerm, dié ou dingetjie in sy vrou se maag, hul heel eerste baba wees?

Eers ná drie swangerskaptoetse en ’n doktersbesoek op Mosselbaai het die televisieboer Tickey van Wyk (36) regtig geglo hy gaan pa word. “Toe die suster sê: ‘Ek sê jou mos dié ooi is dragtig,’ toe besef ek, jong, dit ís so,’’ vertel die aantreklike skaapboer hier in die ruim plaaskombuis van sy huis op Wolwas-boerdery anderkant Loxton.

Nou wil hy leer om ’n babadoek foutloos om te ruil, dié dat Tickey deesdae voorgeboortelike klasse bywoon. “Sodat ’n ou darem kan weet waarvoor hy hom inlaat...”

Hy is die man wat voorverlede jaar op die TV-program Boer Soek ’n Vrou halsoorkop verlief geraak het op die laer-skoolonnie Selme-Louise du Plessis (29), en nog voor jy kon sê skaap, toe staan die twee in die veld voor die dominee op haar ouers se plaas buite Nelspruit.

En nou is dit sulke tyd hier op Loxton. Die kleintjie kom in Mei.

“Ons is dankbaar, al het dit heelwat vroeër gebeur as wat ons beplan het,’’ sê die sprankelende donkerkop wat deesdae boervrou is. “Ons kla nie. Tickey wou nog altyd dadelik met ’n gesin begin en ek wou nog wag, maar dis ’n geskenk van God.”

Die oupas en oumas aan albei kante is sommer dadelik gebel. En die huiswerker Anna van Rooi het dadelik gesê sy’t “lank-al geweet’’.

Die twee lag lekker.

Vermoedelik het Tickey al verlede jaar groot planne gehad, want hoekom het hy dan toe ’n bababedjie op ’n veiling gekoop? “Ons was nog nie eens getroud nie,’’ sê hy blinkoog. “Toe koop ek dit en skuur dit af. En kyk nou net hoe goed gaan dit te pas kom.’’

Lees die volledige artikel en sien meer foto's in die 25 Maart-uitgawe van Huisgenoot. 'n Inskrywingsvorm vir die derde reeks van Boer Soek 'n Vrou verskyn ook in die nuwe Huisgenoot. Uitsendings van die derde reeks van Boer Soek ’n Vrou begin in September op kykNET.