Toe Kevin Whitney van Chikasha in die Amerikaanse deelstaat Oklahoma einde verlede jaar sy iPhone 5 in ’n graansilo laat val, het hy nie gedink hy sal ooit weer sy luukse slimfoon sien nie.

Groot was sy verbasing dus toe hy agt maande later ’n oproep kry dat sy selfoon deur ’n werker by ’n graansilo in Kasjiema in Japan opgespoor is, berig Kfor.com.

Kevin se selfoon het vanaf die silo in Oklahoma saam met sowat 140 t graan gereis tot by ’n opslagplek in Louisiana, voor dit per skip na Japan verskeep is.

Die werker in Japan het Kevin se identiteit uitgepluis deur na die foto’s en ander inligting op die foon te kyk, voor hy hom verlede week laat weet het hy het sy vermiste selfoon by hom.

“Daar was heelwat foto’s met sentimentele waarde op die foon, en ek was baie bly om dit terug te kry,” het Kevin aan Kfor.com gesê.

Bronne: Kfor.com; SkyNews; Daily Mail