’n Goeie Dag vir Boomklim deur Jaco Jacobs gaan volgende jaar in Engels uitgegee word.

“Oneworld Publications het die wêreldwye Engelse vertaalregte bekom. Dié onafhanklike uitgewery se boeke het reeds twee keer agtereenvolgens die Man Booker-prys verower, en hul boeke word wêreldwyd versprei,” het Lapa Uitgewers in ’n verklaring op Facebook gesê.

Die boek het verlede jaar die kykNET/Rapport-fliekprys gewen, en die fliekregte is onlangs aan M-Net toegeken.

Jaco het die goeie nuus op sy Facebook-blad bevestig.

“So tussen al die afgelope week of wat se slegte nuus deur, moes ek hierdie goeie nuus geheim hou,” het hy op Facebook geskryf.

Lapa Uitgewers het ook bekendgemaak die boek is op die Bologna-kinderboekskou in Italië as een van vier eretitels in die internasionale In Other Words-vertaalprojek aangewys.

“A Good Day for Climbing Trees” gaan deur Kobus Geldenhuys vertaal word en sal volgende jaar op die winkelrakke wees.