resensie-jimmy-in-pienk-review-movie

Dié komedie, wat Augustus verlede jaar in Suid-Afrika uitgereik is, kan moontlik ’n Beloit Internasionale Rolprentfees-prys in die kategorie beste vollengterolprent wen, wanneer dit tussen 14 en 24 Februarie op dié fees buite Chicago Amerika draai.

Die fliek handel oor ’n mielieboer en skaapskeerder wat noodgedwonge sy lewe op die plaas moet prysgee vir die stad, en daar die fynere kunsies van haarstilering moet baasraak om sy gesin uit ’n skuldput te red. Die akteurs Louw Venter, Terence Bridgett, Gys de Villiers, Tinarie van Wyk Loots en Shaleen Surtie-Richards speel daarin.

“Dis flippen great wanneer jou harde werk raakgesien word, en dit nogal in Amerika,” sê Louw vir Huisgenoot.

“Net om benoem te word beteken vir ons verskriklik baie.”

Hy’s nog onseker of hy die prysuitdeling gaan bywoon.

“Ek weet darem nie, maar as iemand dalk ’n ekstra vliegtuigkaartjie Chicago toe het wat iewers rondlê . . .” grap hy.

Die wenners word op 20 Februarie aangekondig.

– Christiaan Boonzaier