[caption id="attachment_171995" align="alignnone" width="600"]Foto: Magazine Features Foto: Magazine Features[/caption]

Parry Romberg-sindroom is gediagnoseer by Lucy, van Moota Bay in Suid-Australië, toe sy agt maande oud was. Dis ’n seldsame siekte waar die immuunstelsel die weefsel onder die vel laat krimp.

Haar verslae ouers, Jodie (47) en Nick (37) Hancocks, het gehoor dokters kan niks doen om hul dogter te red nie.

Maar hulle het geweier om moed op te gee en het ’n dokter oorsee opgespoor wat bereid was om te help.

Die egpaar het binne enkele maande sowat R2 miljoen ingesamel en ondanks ’n paar terugslae kon hulle help keer dat Lucy die helfte van haar gesig verloor.

Chirurge het met baanbrekerstegnieke weefsel van haar rug oorgeplant om haar krimpende gelaatstrekke te herbou.

Jodie, ’n heeltydse ma, sê: “Ek het by geboorte dadelik geweet iets skort met Lucy. Die linkerkant van haar gesig het kleiner as die regterkant gelyk.

“Ek het Parry Romberg-sindroom nagevors en was verslae toe ek lees wat die toekoms vir Lucy inhou.

“Dokters het gesê hulle kan niks doen om die vernietigende siekte te keer nie, maar ons het geweier om moed op te gee.

“Ons het dit reggekry om AU$200 000 (sowat R2 miljoen) in te samel sodat Lucy drie operasies in Amerika kon ondergaan.

“Dit het haar gesig help herbou en die wrede siekte gestuit wat ook letsels aan die linkerkant van haar brein veroorsaak.

[caption id="attachment_171997" align="alignnone" width="600"]Foto: Magazine Features Foto: Magazine Features[/caption]

“Om te keer dat dit vererger, het sy ook steroïede vir die swelsel gekry. Maar dit het haar verwronge gelaat, want haar gesig het begin hang.

“Tog is Lucy baie dapper. Sy is nie skrikkerig vir chirurgie nie. Ons behandel haar glad nie anders as ons ander kinders nie.”

Lucy se toestand is nie maklik om weg te steek nie, want dit is aan haar gesig en vreemdelinge op straat spot soms wreed met haar.

Jodie voeg by: “Mense het ons al aangestaar, na ons vinger gewys en vrae gevra soos: ‘Wat het met haar gesig gebeur?’

“Lucy raak verleë en staan net agter my terwyl ek haar seldsame toestand verduidelik.

“Gelukkig is sy ’n taai kind en sal sy sê: ‘Ek gaan baie mooi lyk ná my operasies,’ wanneer ons haar toekomstige operasies bespreek.”

Parry Romberg-sindroom het van haar geboortedag af Lucy se gesig begin verwoes. Maar danksy die chirurgie het Jodie en Nick van die beheer teruggekry.

Jodie sê: “Die hele linkerkant van Lucy se gesig is vervang, wat as ’n mikrovaskulêre vrye weefseloorplanting bekendstaan. En sy het ook ’n frontalelobvervanging gehad, iets wat die voorkant van haar skedel help herbou het.

“Die derde operasie was ’n kopvelflap aan die voorkop, waardeur weefsel van die bokant van die kop gevat is.”

“Ons was by dieselfde chirurg vir al haar operasies en ons het ons vertroue in hom gestel.

“Sy het al so baie deurgemaak vir een meisietjie, maar ten spyte van alles glimlag sy altyd en is sy gelukkig.

“Ek hoop ons storie help enige ander gesinne wat iets soortgelyks beleef. Want sonder die geldinsameling en soektog na alternatiewe behandeling, sou Lucy se lewensgehalte heeltemal anders gewees het.”

Dr. Anjali Mahto, raadgewende dermatoloog en woordvoerder van die Britse velstigting, sê: “Parry Romberg-sindroom is ’n seldsame outo-immuumtoestand wat die een kant van die gesig aantas waarmee daar ’n verlies van weefsel soos vet, spiere en been onder die vel is.

“Dit kan moeilik wees om te behandel en verg dikwels die gebruik van medisyne wat die immuunstelsel onderdruk.”

– Magazine Features