Eers was daar net die verwyt. Oor die jare het dit omgesit in ’n obsessie wat daagliks soos ’n vuur in haar brand. Maar selfs dit kan sy nog hanteer.

Dis die drome oor haar vermiste sussie, vasgevang in die veroordeelde seksmisdadiger Gert van Rooyen se kloue, wat haar onderkry. Soos nou die nag weer.

Êrens in die droomnewels sien sy Odette se mediese verslag. Die adres waar haar kleinsus aangehou word, is daarin geskryf. Sommer net so, asof sy nie al 21 jaar daarna soek nie.

Dit lei haar na ’n verlate hoewe, en daar sien Natasha Smuts ’n groot ou boom. Pers karre staan oral op die werf rond. In ’n krot sit ’n meisie met lang vlegsels by ’n tafel. Langs haar sit ’n seun wat gulsig eet.

“Waar is Odette?” vra Natasha. Die seun wys met ’n vinger na die meisie wat antwoord: “Ek is Odette.”

Maar Natasha glo haar nie, draai haar rug op die kinders en ry weg. Dis met die terugkyk dat sy in haar truspieël sien hoe die meisie na die boom stap, op haar knieë neersak en ’n plaatjie, soos dié van valstande, uit haar mond haal.

Dan skrik sy wakker met Odette se pleitende stemmetjie in haar ore: “Asseblief iemand, kom haal my net. Kom red my net.”

Natasha (35) knyp haar blou oë toe. Haar woorde is skaars hoorbaar. “Een van die sieners het gesê ek sal die sleutel wees om my suster te vind. Maar hoe sal ek haar kry as ek die tyd rondom haar verdwyning nie eens behoorlik kan onthou nie?” vra sy in ’n pleitende stem.

Dis vanjaar 21 jaar sedert Odette Boucher (12), Tracy-Lee Scott-Crossley (13), Fiona Harvey (11), Joan Horn (13), Anne-Marie Wapenaar (12) en Yolanda Wessels (12) asof in die niet verdwyn het.

Die pedofiel Gert van Rooyen en sy houvrou, Joey Haarhoff, het die meisies destyds in die laat tagtigs ontvoer.

Met die polisie warm op hul spoor het Gert eers vir Joey en toe homself geskiet, en die raaisel oor die meisies se lot is saam met hulle graf toe.

Terwyl mense twee dekades later steeds oor die Van Rooyen-sage wonder, spook die verlede nog elke dag by Natasha. Sy kan nie vergeet nie, want haar siekte herinner haar elke dag aan haar suster.

Natasha, wat twee jaar ouer as Odette is, het ná die skok van die gebeure wat haar gesin des-tyds getref het, diabetes opgedoen.

Ná twee swangerskappe moet sy dringend ’n nieroorplanting ondergaan. Intussen moet sy drie keer per week dialise ondergaan.

Lees die volledige artikel in die Huisgenoot van 29 April 2010.

Bespreek vir Skouspel!