Daar is sekere etiketreëls wat jy aan die etenstafel eenvoudig móét gehoorsaam.

As jy die gas is

Wees beleefd teenoor jou gasheer of –vrou. Stel jouself voor as julle nog nie ontmoet het nie. Hier is nog ’n paar reëls:

  • Daag betyds op.
  • Neem ’n dankie-sê geskenk saam, as is dit net iets klein soos ’n sjokolade.
  • Sê dankie dat jy genooi is.
  • Vra die gasheer of -vrou uit en kry iets om oor te gesels.
  • Bied aan om te help – selfs met die skottelgoed!
  • Bêre jou selfoon en ander elektroniese ware in jou sak. Moet nooit aan tafel ’n SMS stuur, ’n oproep beantwoord (tensy dit ’n saak van lewe en dood is) of ’n boodskap op Facebook laai nie.

Dek die tafel só

  • Begin by die stoel. Dit sal jou ’n verwysing gee van waar jou gas sal sit.
  • Die mes se lem moet altyd na binne wys (na die bord se kant toe).
  • Die dessertlepel se steel wys na regs.
  • Die wynglas en kort glas word regs van die bord neergesit.

Tafelmaniere

  • Sit regop en moenie jou arms of elmboë op die tafel laat rus nie.
  • Neem die servet en sit dit op jou skoot. As jy klaar is daarmee, vou dit op en sit dit langs jou bord neer.
  • Wag eers totdat al die gaste opgeskep het voordat jy begin eet.
  • Proe eers die kos voordat jy sout of peper oorstrooi.
  • Botter jou brood op jou bord, moenie jou brood in die lug laat hang nie.
  • Wanneer jy geregte aanstuur, sorg dat dit in een rigting beweeg, gewoonlik na regs.
  • As daar meer as een kosgang is, gebruik die messegoed wat die verste van die bord geplaas is, eerste gebruik.
  • Moenie die laaste porsie kos opskep voor jy nie vir die ander gaste gevra het of hulle dit dalk wil hê nie.
  • Wanneer jy klaar geëet het, sit die mes en vurk teen mekaar op jou bord neer.
  • Wanneer jy tydens ete moet badkamer toe gaan, sê eenvoudig: “Verskoon my, ek sal nou terug wees.”