Netflix en saam ontspan is nie net vir warm, nuwe paartjies bedoel nie. Om rustig voor die kassie of in ’n fliek te gaan sit, kan die sleutel tot ewigdurende liefde wees.

Navorsers aan die Aberdeen-universiteit in Skotland het bevind paartjies wat nie daarin belangstel om hulle te vergryp aan Mad Men of Game of Thrones nie, kan die gevoel van innigheid ervaar deur dieselfde boek te lees.

Vir die paartjies wat nie so baie gemeenskaplike vriende het nie, sal ’n gedeelde belangstelling in ’n televisieprogram of ’n boek hul verhouding die meeste baat.

Die deskundiges beweer die rede hiervoor is dat die meeste paartjies hulle vereenselwig met die karakters wat hulle sien of waarvan hulle lees.

Lees ook: Hierdie is die ware rede waarom jy in jou verhoudings moet belê

Hierdie gevolgtrekkings is gemaak nadat ’n groep van meer as 250 mans en vroue, almal in langtermynverhoudings, deur dr. Sarah Gomillion en haar span uitgevra is.

Hulle is byvoorbeeld gevra hoe geheg hulle voel aan hul wederhelf, in watter mate hulle by hom/haar betrokke is, en hoe dikwels hulle saam televisie en rolprente gekyk of dieselfde boek gelees het.

Hulle is ook gevra watter gemeenskaplike vriende hulle het.

Lees ook: Verhoudings onder meeste druk ná 10 jaar, nie sewe nie

Die resultate het getoon dat paartjies wat gereeld saam tyd voor die kassie deurbring of dieselfde boek lees, meer intieme verbintenisse het. Dit was veral waar indien paartjies ’n klompie vriende deel.

“Hierdie resultate dui aan dat mense gemotiveer kan word om sekere media te deel om te vergoed vir ’n leemte in die sosiale netwerk wat mense met hul maats deel,” het Sarah gesê.

“’n Werklik maklike manier waarop die gehalte van ’n verhouding verbeter kan word, is om televisie of ’n fliek saam met ’n maat te kyk. Enigiemand kan dit enige tyd doen. As dit goed is vir verhoudings, kan dit ons dalk help om ’n ingryping te identifiseer wat die gehalte van ’n verhouding kan verbeter.”

Die studie is in die Journal of Society and Personal Relationships gepubliseer.

© Cover Media