Dis nie te sê vroue word aangeraai om hul brugklub-ontmoetings in hemelhoë hakskoene by te woon nie, maar ’n skoen met ’n effensie hakkie bied beter balans as ’n platskoen. “Die meeste hakskoene het ’n baie klein oppervlak om op te loop, en jy het dus ’n goeie sin vir balans en propriosepsie (’n sin vir hoe verskillende liggaamsdele in verhouding tot mekaar beweeg) om daarin te kan loop,” sê Christopher Walker, ’n konsultant in trauma en ortopediese chirurgie by die Royal Liverpool-universiteitshospitaal, berig MailOnline. “Hakskoene gee vroue ’n baie goeie sin vir balans.”

Die kanse dat jy sal val, neem met die ouderdom toe; jaarliks val daar een uit drie mense oor 65. En die grootste oorsake van sterftes weens ’n ongeluk onder mense ouer as 75 is wanneer hulle val. Dit kan ook lei tot beenbreuke en lang herstelperiodes – sommige mense kan daarna nooit weer ten volle onafhanklik wees nie.

Die vermoë om jou balans te versterk, kan die geheim wees tot die voorkoming van hierdie soort valongelukke. Veranderinge in balans kan so vroeg as die 30’s voorkom wanneer die deel van ons brein wat ons spirere beheer – die motoriese korteks – begin agteruitgaan.

Spiere sê vir die brein waar om die voet neer te sit en om kennis te neem van die ruimte rondom die voet, maar soos hierdie vermoë afneem, raak ’n gestruikel ál algemener. Balans gaan nie net oor waar jy jou voet neersit nie, maar ook oor hoe jy inligting van die oë, spiere en meganismes in die oor interpreteer. Hakke daag jou sin vir balans uit, wat hierdie meganismes kan slyp.

“As vroue ophou hakke dra, kan hul sin vir balans agteruitgaan,” sê Christopher. “Ons is geneig om soos ons ouer word ons te probeer beskerm deur breër en platter skoene te dra en nie op ongelyke grond te loop nie, maar dit beteken ons kry nie genoeg oefening om goeie balans te handhaaf nie. Hoewel ons ons dus probeer beskerm, verswak ons balans. Hakke bied ’n mate van beskerming daarteen.”

Maar Christopher waarsku dit is beter om platskoene te dra as jy siek is omdat die ouderdom ook die spiere se herstelproses ná ’n onaktiewe tydperk (soos as jy bedlêend was) beïnvloed.

© Cover Media