’n Span van King’s College in Londen en die Universiteit van Cardiff het beskikbare getuienis nagegaan oor die verband tussen kinders se slaappatrone en die gebruik van toestelle.

Hulle het 20 studies ondersoek wat 125 000 kinders, met ’n gemiddelde ouderdom van 14 jaar, betrek het.

Die navorsers het toe bevind kinders en tieners wat selfone en tablette teen slaaptyd gebruik, slaap waarskynlik twee keer minder as dié wat dit nie doen nie.

Hulle het ’n konsekwente verband gesien tussen kinders en tieners wat hul skerms tydens slaaptyd gebruik het en ’n gebrek aan slaap, sowel as slaap van ’n swak gehalte.

Dieselfde soort slaapprobleme is voorts gevind by kinders wat saans toegang gehad het tot draagbare toestelle, hoewel hulle dit nie met slapenstyd gebruik het nie.

Volgens dr. Ben Carter van King’s College bied die oorsig nog bewyse van die skadelike uitwerking van mediatoestelle op die duur sowel as die gehalte van die slaap.

“Slaap is dikwels ’n ondergewaardeerde maar belangrike deel van ’n kind se ontwikkeling en ’n gereelde gebrek daaraan veroorsaak verskeie gesondheidsprobleme,” het hy verduidelik.

“Die steeds groeiende gewildheid van draagbare mediatoestelle en hul gebruik in skole om teksboeke te vervang, gaan beslis die probleem van slegte slaap by kinders vererger.

"Ons bevindings dui aan dat ’n geïntegreerde benadering wat ouers, onderwysers en gesondheidsorgkundiges betrek, nodig is om toegang tot hierdie toestelle te verminder en om goeie slaapgewoontes naby slaaptyd aan te moedig.”

Daar word gedink dat mediatoestelle met skerms op verskeie maniere slaap nadelig beïnvloed, insluitend die uitstel of onderbreking van slaaptyd, dit stimuleer die brein sielkundig en beïnvloed slaapsiklusse, fisiologie en waaksaamheid.

Dit is bekend dat slaapsteurings in die kindertyd ’n uitwerking op die gesondheid het, soos byvoorbeeld ’n swak dieet, vetsug, verlaagde immuniteitsfunksie en vertraagde groei, sowel as dat dit verband hou met geestesgesondheidsprobleme.

Die oorsig is in JAMA Pediatrics gepubliseer.

© Cover Media