MY EERSTE WOORDEBOEK deur Maja Sereda (Lapa Uitgewers, R80)

Maak jou kind se ore klein-klein oop vir die klank van meer tale as net sy eie.

Hierdie groot hardebandboek stel ’n kind gelyktydig voor aan Afrikaans, Engels, Xhosa en Zoeloe.

Dit is in temas opgedeel soos Partytjietyd, Plaas, My Liggaam, Skool Toe en Diere. Onder die tema Dwarsdeur die Jaar, byvoorbeeld,  word die dae van die week, seisoene, maande van die jaar en weerstoestande baie mooi geïllustreer. Elke prentjie word deur een woord in die vier tale beskryf.

Dit is geskik om aan kinders van so jonk as drie voorgelees te word, terwyl dit vir skoolgaandes goeie oefening sal wees om te sien hoe dieselfde woord in verskillende tale gespel word.

Maja Sereda, ’n oud-Pool en oud-Tukkie, se illustrasies is realisties en vol humor. Benewens ouers wat graag vir hul kinders voorlees, sal die boek ook in enige skoolbiblioteek ’n aanwins wees.