Sênou maar die huis raak aan die brand, wat sal Carina Diedericks-Hugo eerste red?

“My Maasdorpboeke, duh!” roep sy uit en wys trots na die versameling tussen die duisende ander boeke in haar Stellenbosse huis. Maar natuurlik eers wanneer haar katvriende en manlief, die skrywer Daniel Hugo, veilig is, voeg sy dan vinnig by.

Deesdae is Carina se Thomas@-jeugboeke net so gewild soos Stella Blakemore se ikoniese reeks, en baie kinders lees al sewe Thomas@-boeke oor en oor – nes Carina elke jaar met haar kosbare Maasdorp-boeke gemaak het.

Sy is al vyf keer met die ATKV-Kinderboektoekenning vereer, ’n prys waarvoor kinders self stem. En sedert sy in 2001 begin skryf het aan Thomas@moord.net, is meer as 100 000 eksemplare van die avonture van die Kaapse skoolseun Thomas Steyn al verkoop.

Carina se jong aanhangers smeek haar gereeld om nog Thomas@-boeke te skryf en vanjaar verskyn die agtste boek in die reeks.

Sy het as student gou besef diep en donker letterkunde vloei nie gemaklik uit haar pen nie. ’n Uitgewersvriendin het haar aangemoedig om jeugboeke te begin skryf, en nou, sê die mooi blondine, kan sy aan niks lekkerders dink om te doen nie.

Lees meer in die Huisgenoot van 4 Februarie 2010.