Onthou jy nog hoe jy smiddae in die dorpsbiblioteek skooltake voltooi het? Jy het deur die naslaanrakke gewandel, op soek na inligting, prente en grafieke vir die taak oor wolke wat jy oormôre moes ingee (as jy voorbeeldig was). Hoe sou jy ooit dié take gedoen kry sonder die hulp van daardie volumes naslaanbybels?

As jy dink ensiklopedieë is heeltemal deur die internet van kant gemaak, dink weer! Jacklin-uitgewers het onlangs ’n splinternuwe Britannica Junior: Encyclopedia for Southern Africa (R7 200) in Engels uitgereik. Die bekende radioman en skrywer, Dawid van Lill, en ’n span navorsers, bibliotekarisse en onderwysers het sowat drie jaar gelede die Britse weergawe in Afrikaans vertaal, die Britannica Junior: Ensiklopedie vir Suidelike Afrika. Dié tiendelige stel is nou ook in Engels beskikbaar.

Die jongste weergawe bevat, nes sy Afrikaanse eweknie, ongeveer 450 artikels wat spesiaal vir jong lesers in Suider-Afrika bygewerk is, onder meer insetsels oor prinses Charlene van Monaco, Erfenisdag, Breyten Breytenbach en die Cullinan-diamant.

Die uitgewers glo dié netjiese tiendelige ensiklopedie sal nog lank van onskatbare waarde wees, veral in skole wat nie toegang tot die internet het nie.

Shané Barnard