Volgens Childsafe is passasiersterftes by kinders die vierde belangrikste oorsaak van onnatuurlike sterftes in ons land. ’n Kind wat nie vasgegespe is nie, sal selfs in die geval van ligte ongelukke in die motor rondgeslinger word en kan sodoende hulself en ander passasiers beseer.

Childsafe sê voorts vasgespe verlaag die risiko vir dood in ’n passasiersmotor met 71 persent in die geval van babas en 54 persent by kleuters.

Arrive Alive sê die korrekte gebruik van ’n karstoeltjie is een van die doeltreffendste maatreëls om passasiers tydens ’n ongeluk veilig te hou,” sê Casey Rousseau, woordvoerder vir die versekeringsgroep 1st for Women.

“Karstoeltjies is nes sitplekgordels ontwerp om die insittende veilig in die sitplek te hou sodat hy nie rond- of uit die voertuig geslinger word as die bestuurder skielik rem of as ’n ongeluk gebeur nie,” sê Casey.

“Dis eintlik eenvoudig: As die karstoeltjies korrek gebruik word wanneer die kind ook al in die motor is, kan baie sterftes voorkom word.”

Baie ouers dink dis veilig om hul baba in hul arms vas te hou of die kind op hul skoot te hou wanneer hulle ry, maar dis nie waar nie. Navorsing het getoon tydens ’n botsing of wanneer skielik rem getrap word, het passasiers minder as ’n halfsekonde om te reageer. Dis onwaarskynlik dat ’n volwassene ’n kind in hierdie tyd sal kan vashou.

Wanneer jy ’n karstoeltjie kies, moet jy een kry volgens jou kind se gewig. As die kind op die verkeerde soort stoeltjie vir sy ouderdom of gewig vasgegespe is, of die bande of harnas is nie behoorlik vas nie of selfs los, is die kans groter dat die kind sal seerkry of selfs sterf.

Volg altyd die vervaardiger se aanwysings wanneer jy ’n karstoeltjie installeer of jou kind daarin plaas.

1st for Women bied die volgende wenke vir die korrekte en veilige gebruik van karstoeltjies:

1. Maak seker die karstoeltjie voldoen aan die nodige veiligheidstandaarde.

2. Die bande moet nommerpas wees, en nie slap wees of knyp nie.

3. Bande moet onder die skouers wees as jou kind agtertoe kyk en bo die skouers as hy vorentoe kyk.

4. Skuif die plastiekknip wat die twee bande bymekaarhou op okselhoogte voor jy dit vasmaak.

5. Verwyder bonkige klere voor jy jou kind vasgespe en draai hom eers daarna toe in sy kombersie.

6. Maak seker die bande is nie gedraai nie, want dit kan die doeltreffendheid daarvan tydens ’n botsing verlaag.

7. As jy ’n tweedehandse karstoeltjie koop, doen dit net as jy sy geskiedenis ken of weet dit kom van ’n goeie bron af. Moenie ’n stoeltjie koop wat in ’n ongeluk was of waarvan die bande, gespes of vashegpunte verweer is nie.

8. Probeer om jou kind so lank moontlik in die agtertoekyk-posisie laat sit. Dié posisie word aanbeveel tot op driejarige ouderdom, maar dit kan verkieslik langer gebruik word. As die kind agtertoe kyk en daar is ’n botsing van voor, word die impak van die botsing oor sy hele rug en kop versprei. As hy vorentoe kyk, is sy kop meer blootgestel.

9. Maak seker die karstoeltjie wip nie verder as 2,5 cm vorentoe of sywaarts nie.

10. Speelgoed kan jou kind tydens ’n botsing beseer, dus moet dit sag wees.

11. Stel ’n goeie voorbeeld as ouer en gespe jou ook altyd vas.