Die meeste ma’s weet oefening is goed vir hul kind se gesondheid. Nou toon nuwe navorsing dat liggaamlik fikse kinders dalk beter taalvaardighede as hul onfikse maats het.

Navorsers in Chicago het bevind fikser kinders se brein reageer vinniger en sterker wanneer hulle lees; hulle het dus beter leesbegrip. Die studie het gefokus op breingolwe wat verband hou met woordherkenning en grammatika.

“Ons studie toon die breinfunksie van fikser kinders is anders: Dit lyk asof hulle die brein beter inspan vir kognisie, wat hul leesbegrip verbeter,”  het die hoofnavorser, Charles Hullman gesê. Hy is ’n dosent in kinesiologie en gemeenskapsgesondheid aan die Universiteit van Illinois.

Die navorsers het wel gesê nog navorsing  is nog nodig om die skakel tussen verbeterde breinfunksie en liggaamlike fiksheid by kinders te ondersoek. “Ons weet net is daar is verskille tussen fikse en minder fikse kinders,” het Charles verduidelik. “Of dié verskille deur fiksheid veroorsaak word, of dalk deur ’n derde veranderlike wat fiksheid en taalverwerking beïnvloed, weet ons nog nie.”

Bronne: Healthday.com, psychcentral.com