Ons weet almal dis nie maklik om gewig te verloor nie, maar as jy voedselsoorte kies wat sal help om spiere te herstel en jou bloedsuiker te stabiliseer, sal dit makliker wees om by ’n gesonde eetplan te bly.

“Jou liggaam het spesifieke voedingstowwe nodig ná oefening ten einde spiere te herstel en jou bloedsuiker te stabiliseer,” verduidelik die dieetkundige Cassie Bjork aan die tydskrif Women’s Health.

Die keuse van die regte kombinasie van kosse kan jou herstel verbeter en terselfdertyd jou metabolisme versnel en jou sodoende in die vinnige baan na gewigsverlies plaas.

Probeer om iets te eet binne ’n uur nadat jy geoefen het, want dan is jou spiere gepomp en gereed om voedingstowwe die beste te absorbeer.

Kyk dus hoe die kilogramme wegsmelt nadat jy jou maaltyd of happie ná oefening “opgegradeer” het.

Lees ook: Dié agt wenke kan jou help om gewig te verloor

Hier is ons keuse van die beste kossoorte om ná ’n oefensessie as brandstof te dien:

Volkoring-tortilla met kalkoen en groente

Ná ’n fiksheidsklas waar jy koolhidrate verbrand het, sal ’n veselryke tortilla met graan en groente jou brandstofvoorraad aanvul en jou energiek laat voel, dus sal jy jou nie ooreet nie.

Koolhidrate, tesame met proteïenryke kalkoen, help jou liggaam om spiere te herstel en op te bou en jou metabolisme ’n hupstoot te gee.

Amandels en ’n lemoen

Pak hierdie draagbare happie in jou sak as versnapering terwyl jy aan die gang is.

Neute verskaf proteïen en gesonde vette, en dit kan ook jou ergste honger stil.

Amandels as versnapering onderdruk jou eetlus, terwyl lemoene koolhidrate, immuniteitsversterkende vitamien C en hidrasie verskaf – alles in een gerieflike pakkie.

Skommeldrankie, gemaak van avokado, bessies en proteïenpoeier

Skommeldrankies is die ideale bederf ná oefening.

Die byvoeging van ’n paar skyfies avokado help jou om langer versadig te bly en die gesonde vette steun die werking van jou gewrigte, wat op hul beurt weer jou beweeglikheid tydens oefening kan aanhelp.

Voeg ’n hand vol bevrore bessies, ryk aan anti-oksidante, en ’n skeppie proteïenpoeier of proteïenryke Griekse jogurt by.

Lees ook: Oefening douvoordag hou jou viets

Salm, gemeng met olyfolie, seldery en druiwe

Omskep gevlokte of geblikte salm in ’n vinnige slaai.

Voeg seldery en druiwe by vir koolhidrate en vesel, asook ’n paar skeute olyfolie vir ’n dosis gesonde vette.

Salm, ryk aan Omega-3, kan van die na-oefening-inflammasie in spiere, wat seerheid veroorsaak, verlig. Volgens navorsing kan hierdie gesonde vissoort moontlik die verbranding van vet versterk.

Eiers met swartboontjies en soetrissies

’n Ontbyt van veselryke swartboontjies verskaf koolhidrate ná ’n swetende oggendoefening, terwyl die soetrissies vitamien C bydra.

Voeg die proteïenryke eier by en dit sal voorkom dat jy jou die res van die dag ooreet.

© Cover Media