. Het jy geweet jou brein benodig voedingstowwe net soos wat jou hart, longe en organe dit nodig het? Jy weet hoe dit voel - sommige dae kan jy net nie konsentreer nie, sommer net 'brein-moeg"...Daar's nie 'n wondermiddel op die mark wat jou beter gaan help as om die regte breinkos te eet nie. 

Hou hierdie nuttige gids altyd byderhand!

Onthou ontbyt

Moenie ontbyt oorslaan nie! Dit is die belangrikste maaltyd van die dag, aangesien dit jou metabolisme aan die gang kry en jou denkprosesse opskerp. Eet deur die dag kleiner porsies meer gereeld om sodoende jou brein van suurstof te bly voorsien. Vermy suikerbelaaide kits-ontbytgraankos en maak eerder pap soos hawermout of eier in die een of ander vorm. Dit sal jou kind se brein stimuleer en nie tot gevolg hê dat sy of haar energievlakke in die middel van die oggend daal nie.

Drink baie water

Dit is belangrik om goed gehidreer te bly. Drink minstens 1,5 tot 2 liter water per dag. Dit help voorkom moegheid en hou  die konsentrasievlakke hoog.

Kies volgraankosse en komplekse koolhidrate

Komplekse koolhidrate, die soort wat sorg dat jou energievlakke konstant bly, kry jy in volgraankosse soos volgraanbrood, bruinrys, hawermout, vrugte en groente. Tydens die verteringsproses word koolhidrate omgeskakel na glucose (suiker) wat die brein se primêre bron van energie is. Die vitamien  B daarin sorg ook vir die ontwikkeling van ’n goeie senuweestelsel.

As die glukosevlakke van jou bloed egter te veel wipplank ry (byvoorbeeld wanneer jy te veel verfynde kos soos witbrood en fyngebak eet), kan jy duiselig, verward, onoplettend en selfs slaperig voel. Komplekse koolhidrate word stadiger in die bloedstroom opgeneem as verfynde koolhidrate; dit verseker dat bloedsuikervlakke meer stabile bly en help dat jy beter oplet en konsentreer.

Hap daai hawermout

Hawermout, nog ’n komplekse koolhidraat, staan bekend as dié graansoort vir jou brein. Dis nie net ’n goeie energie-reguleerder nie, maar bevat ook vitamien B, E, kalium en sink wat help dat jou brein en jou liggaam goed funksioneer.

Bessies bo

Bessies soos aarbeie, bloubessies en kersies, bevat almal baie antioksidante, asook vitamien C. Bloubessies help jou veral om beter te onthou.

Reg met suiwel

Melk en jogurt bevat nie net proteïen en kalsium nie, maar ook B-vitamiene en koolhidrate wat energie verskaf aan die brein. Gegeurde melkdrankies bevat nie veel meer suiker as jou gemiddelde vrugtesap nie, so pak met ’n geruste hart ’n geurmelkie in saam skool toe. (Dit moet verkieslik laevet wees).

Eet baie proteïen

Proteïenryke kos (vleis, vis, melk, kaas, lewer en pluimvee) verskaf die boublokke vir die meeste liggaamsvesel, senuwees en inwendige organe, insluitend die brein en hart. Dit word ook gebruik om senuwee-impulse in die brein oor te dra. Daarby bevat dit baie yster wat verstandelike wakkerheid aanhelp en belangrik is vir groeiende kinders. Ander ysterryke kos sluit in spinasie, droëbone en droëvrugte.

Beter bone

Droëbone en peulgroente wat ook uit komplekse koolhidrate en proteïen bestaan, verskaf ’n konstante energievloei na die brein en bevat naas vesel ook ander vitamiene en minerale.

Smul aan eiers

Eiers is nie net ryk aan proteïen nie, maar die eiergeel bevat ook lesitien, wat die brein stimuleer, en cholien, wat help om die geheue te verbeter.

Laat waai met broccoli en tamaties

Broccoli is ’n goeie bron van vitamien K wat help om ’n mens se kognitiewe funksies en breinkrag te verbeter. Tamaties bevat weer likopeen, ’n kragtige antioksidant wat help om die liggaam teen die tipe vrye radikale te beskerm wat veral Alzheimer se siekte veroorsaak.

Smul aan olierige vis

Omega-3-vetsure is die sogenaamde goeie vette wat ook help dat die brein goed funksioneer. ’n Tekort daaraan kan onder meer lei tot depressie, ’n swak geheue, ’n lae IK, leerprobleme, disleksie en aandaggebrek. Olierige vis, soos veral salm, maar ook sardyne, forel, tuna, haring, makriel en ansjovis is ryk aan omega-3-vetsure. Ander bronne is avokado, vlassaad- olie, salmolie, asook koudgeperste olies soos olyf- en canola- olie en neute soos okkerneute en amandels.

Peusel aan neute en sade

Neute bevat cholien en vitamien E wat jou help om te onthou, terwyl pampoensade heelwat sink bevat wat belangrik is vir die verbetering van jou geheue en denkvermoë. Ander produkte ryk aan vitamien E is groen blaargroentes, eiers, bruinrys en volgraankosse.

Grondbone bo

Grondbone en grondboontjiebotter is goeie bronne van vitamien E, ’n goeie antioksidant wat die senuweemembrane beskerm. Dit bevat ook tiamien, wat die brein en senuweestelsel help om glukose in energie te omskep.

Sny dit uit

Net soos sekere kossoorte goed is vir jou brein, is daar ook ander wat jou energie tap en jou aandagvlakke verlaag. Dit sluit veral die volgende in: Kos met kunsmatige versoeters of kleursel  Kos met baie fruktose, soos mieliestroop  Suikerbevattende vrugtedrankies, -sappe en kola  Verfynde witsuiker, fyngebak en witbrood  Transvette en gehidrogeneerde olie (lees die etikette om te kyk of die produk dit bevat)  Geprosesseerde peuselkos en geprosesseerde vleis.