Deur Jane McGroarty:

Hier is vyf algemene dieetstrikke waarin baie mense trap, waarsku Dianne Ivison, ’n geregistreerde dieetkundige van die Kaap.

  1. Beloftes van “met dié dieet kan jy binne ’n week 4 kg afskud”. As dit te goed klink om waar te wees, is dit waarskynlik. Daar is geen kitsoplossing vir ’n langtermynprobleem nie. Maak klein, volhoubare veranderings aan jou eetgewoontes.
  2. Die beginsel van “die dieet het vir my vriendin gewerk”. Een grootte pas nie almal nie. Moenie deur mense beïnvloed word nie en raadpleeg altyd eers jou dokter of ’n dieetkundige voor jy met iets nuuts begin.
  3. Die idee dat inspuitings, dieetskommels en pille alleen vinnige verslanking meebring. Niks hiervan werk sonder ’n gesonde eetplan en oefenprogram nie.
  4. Die voorneme om jou elke dag te weeg. Dit sal aan die begin lyk of jy vining gewig afskud, maar dis danksy ’n verlies aan water. Die waterinhoud van jou lyf kan elke dag wissel, wat jou gewig sal raak. Klim liewer net een keer per week op die skaal.
  5. Die voorneme om net ’n maand op ’n dieet te wees. Dis die grootste fout wat mense begaan. Diëte werk nie, dis leefstylveranderings wat werk.