Of as jy ná werk regtig min tyd het, kan jy ’n leë vertrek by jou werkplek soek en ’n bietjie oefen.

Hier is ’n paar van die maklikste en vinnigste maniere om topfiks te raak.

Hurke

Jy gaan agterstewe soos Kim Kardashian West hê as jy ’n paar van dié hurke doen. Kry net genoeg ruimte waar jy jou knie kan buig asof jy in ’n stoel gaan sit. Buig dit amper teen 90 °. Hou die posisie ’n paar sekondes en lig jou agterstewe dan stadig op. Dit gaan nie net jou agterstewe versterk nie; dit gaan jou dye ferm maak en jy gaan wonderlik in daardie miniromp lyk.

Of jy kan dit by jou lessenaar doen as jy nie daar kan wegkom nie en planne ná werk het. Staan met jou voete effe uitmekaar.

“Druk jou heupe terug om jou gewig op jou hakke pleks van jou tone te plaas. Buk oor teen 45 ° soos jy jou heupe tot knievlak laat sak. Hou jou maagspiere styf en ribbekas hoog. Wikkel jou tone – jou gewig moet op jou hakke wees. Hou jou knieë bo jou enkels. Knyp jou agterstewe om regop te kom,” is die kragafrigter Mike Ryan se raad.

Gemaklike opsitte

Dit is nog iets wat jy sommer by jou lessenaar kan doen. Maar verruil jou stoel vir ’n oefenbal om die meeste daaruit te put. Raak net gemaklik; jy sal voel hoe jou maagspiere werk terwyl jy jou postuur en koördinasie balanseer. Jy hoef nie heeldag daarop te sit nie – begin met ’n uur per dag en verhoog dit geleidelik. Ons wed jou kollegas gaan jaloers wees op jou maklike oefenplan.

Gewigte

Moenie jou arms afskeep nie. Gewigte is ’n maklike manier om armspiere te bou. Kry die regte gewig vir jou en pas net elke oggend en aand vyf minute se strek- en ligoefeninge in. Dit sal nie lekker wees om dit elke dag werk toe en terug te moet karwei nie; moet dus nie die oefeninge by die huis afskeep nie.

Stap of draf

As dit ’n lekker dag is, moet jy die meeste daaruit kry. Los die kort busrit en stap liewer die entjie. Jy besef nie eens jy oefen nie, maar jou bene gaan ál sterker raak wanneer jy stap bo ander vervoer kies. ’n Vinnige drafsessie soggens of saans is ook ’n gratis, maklike manier van fiks word. Jy kan 20 minute draf of 10 minute naelloop (maak seker jy warm ordentlik op) – albei is ewe doeltreffend.

Vorentoe tree en afsak (lunges)

Bring een been vorentoe asof jy ’n lang tree vat en hou jou rug reguit. Sak stadig af; laat jou agterste been vorentoe buig (albei knieë moet gebuig wees). Trap vas met die hak van jou voorste voet om weer terug in die staanposisie te kom; maak seker jy ruil tussen stelle bene om. Sowat 10 hiervan per dag gaan jou wonderlike resultate gee en dis maklik om in te pas waar en wanneer jy kan.

© Cover Media