Dit is ’n ouderdomsverwante breintoestand, en kenners vermoed gene en die omgewing beïnvloed dit.

Mense skat die bevolkingstoename en langer lewensverwagting beteken meer as 106 miljoen mense gaan teen 2050 met die siekte leef, vergeleke met 30 miljoen in 2010.

Die studie, onder leiding van Carol Brayne, ’n dosent in openbare gesondheid aan die Universiteit van Cambridge, het sewe risikofaktore ondersoek wat blyk sterk bande met die siekte te hê.

Daar was diabetes, hipertensie in die middellewe, vetsugtigheid in die middellewe, fisieke onaktiwiteit, depressie, rook en ’n lae opvoedkundige vlak.

Deur die relatiewe risiko vir elk van die faktore met 10 persent te verminder, is dit moontlik om die voorkoms wêreldwyd van Alzheimer-siekte teen 2050 met 8,5 persent (9 miljoen gevalle) te verminder, het die navorsers bevind.

In ’n opname in 2011 is daar bevind soveel soos die helfte van Alzheimer-gevalle kon deur veranderinge in leefstyl en persoonlike welstand voorkom word.

Maar in die nuwe studie word daar bevind dat hierdie skatting te hoog is, aangesien van die risikofaktore met mekaar verband hou.

So is diabetes, hipertensie en vetsug byvoorbeeld verwant aan fisieke onaktiwiteit, wat dan almal op hul beurt verwant is aan opvoedingsvlak.

Die studie is ’n wiskundige model gebaseer op die idee dat die sewe risikofaktore oorsake is pleks van net statistiese assosiasies – ’n aanname wat dikwels groot bespreking in die mediese gebied uitlok.

“Al is daar nie een enkele manier om demensie te voorkom nie, kan ons dalk stappe neem om ons risiko vir demensie op ’n hoë ouderdom te verminder,” het Carol in ’n verklaring van die universiteit gesê.

“Ons weet wat baie van hierdie faktore is, en dat hulle dikwels verwant is.

“Om byvoorbeeld net fisieke onaktiwiteit te probeer bekamp, gaan dit vlakke van vetsug, hipertensie en diabetes verminder; dit gaan dan ook demensie by ’n paar mense voorkom, wat gesonder latere jare tot gevolg het – daar is net positiewe gevolge.”

Die verslag verskyn in die joernaal The Lancet Neurology.