Daar is net twee soorte mense: dié wat gim en dié wat nie.

Maar gims kry sonder uitsondering vroeg in elke nuwe jaar ’n toeloop van dié van ons wat in die laaste kategorie val en wat geesdriftig aansluit, terwyl ons onsself oortuig: Vanjaar is die jaar dat ek fiks gaan word!

Lees ook: Dié wondermiddel kan jou vanjaar maer maak

Maar voor jy jou bankbesonderhede oorhandig en ’n jaarkontrak onderteken sonder enige uitkomkans, oorweeg dit eers om tuis te oefen.

Net omdat jy die gim in die verlede vermy het, beteken dit nie dat jy die handdoek heeltemal hoef in te gooi wat oefening betref nie. Pleks van ’n duur maar nuttelose lidmaatskap, ruim liewer tyd in om in die gerief van jou eie huis te oefen.

Lees ook: Beroemdes deel hul oefenwenke om 2016 aan die brand te skop

Hier is vyf eenvoudige oefeninge wat ’n mens maklik kan baasraak.

Sterspronge

Sterspronge is ’n lekker opwarmingsoefening en dit laat die bloed vinnig bruis. Doen dit vir 1 minuut en volg op met ’n minuut lange drafsessie op dieselfde plek, met die knieë hoog opgetrek. Rus 1 minuut en begin dan weer. Herhaal altesaam drie keer.

Glyende spreibeenhurk

Hiervoor kort jy ’n kantoorstoel; dus sal jy, as jy nie een tuis het nie, moet probeer om dit by die kantoor te doen (miskien tog net nie voor jou kollegas nie!). Staan voor die stoel en plaas die agterkant van jou een voet op die sitplek. Hou jou liggaam regop en skuif die stoel terug terwyl jy afsak en hurk voor jy na die beginposisie terugkeer. Hou jou voorste knie bokant jou enkel en herhaal vir ’n minuut voor jy jou bene omruil.

Muurhurk

Hurk teen ’n muur sodat jou bene ’n reghoek vorm. Hou jou skouers agtertoe en trek jou maagspiere in. Plaas ’n gewig, byvoorbeeld ’n stapel boeke, op jou bobene om die oefening moeiliker te maak. Hou die posisie vir ’n minuut. Rus en herhaal.

Plank

’n Klassieke gimoefening wat maklik op enige plek gedoen kan word en dit sal jou maagspiere in ’n japtrap ferm maak.

Lê op jou maag en plaas jou elmboë naby jou sye, reg onderkant jou skouers. Sit jou tone op die vloer en lig jou op sodat jy op jou voorarms en tone rus en jou liggaam dus soos ’n plank lyk. Hou jou sitvlak af (moet dit nie in die lug opsteek nie) en trek jou maagspiere in. Hou die posisie vir ’n minuut, rus en herhaal vyf keer.

Om dinge bietjie moeiliker te maak, strek een arm op ’n keer en bring dit dan terug tot die voorarm op die vloer is.

Abdominale fietsoefeninge (“crunches”)

Kikker abdominale oefeninge (“crunches”) op met ekstra beenbewegings. Begin in ’n sitposisie met jou knieë gebuig en jou hande agter jou kop, trek jou regterknie na jou bors toe en probeer om dit met jou regterelmboog te raak. Ruil om en hou vir ’n minuut so aan. Rus en herhaal dan die hele oefening vyf keer.

© Cover Media