Navorsers aan die Universiteitskollege van Londen het bevind wanneer iemand oor hul gewig gekritiseer word, sal dit ’n reeds onsekere mens meer laat eet en oefening omdat hulle bang is hulle word gespot.

Navorsers het sowat 3 000 Engelse vroue en mans bo 50 bestudeer. Deelnemers is geweeg en uitgevra oor die teenstand wat hulle kry weens hul gewig, soos om met minagting behandel te word, swak diens in byvoorbeeld restaurante en aanmerkings oor hul gebrek aan intelligensie.

Een uit 20 het erken hulle is anders behandel weens hul voorkoms, maar in die geval van die mees oorgewig deelnemers, wat dis meer as een uit drie.

Die studie, waarvan die bevindinge in die vaktydskrif Obesity gepubliseer is, het gemeld mense was geneig om vir die duur van die studie sowat 1 kg aan te sit as hulle oor hul gewig gekritiseer is, en dié wat oorgewig was, was ses keer so geneig om vetsugtig te raak.

Sarah Jackson, wat die ondersoek gelei het, glo daar is ’n oplossing. Sy meen die media moenie meer die woord “vet” gebruik nie, en vra mense moet afsien van enige moontlike diskriminasie.

“Ons uitslae toon dat gewigsdiskriminasie nie gewigsverlies aanmoedig nie en dui daarop dat dit selfs gewigstoename aanhelp,” het sy verduidelik.

“In vorige studies is bewys dat mense wat diskriminasie ervaar, eet om hulle beter te laat voel. Stresreaksies op diskriminasie kan eetlus verhoog, spesifiek vir ongesonde kos ryk aan energie. Daar is ook al bewys dat gewigsdiskriminasie mense minder vertroue oor fisieke aktiwiteit gee; daarom dat hulle dit vermy.

“Mense voel dalk nie gemaklik in die gim nie as hulle dink hulle word weens hul gewig veroordeel.”

Tam Fry, van die Nasionale Forum vir Vetsug, glo medici moet oorgewig mense meer bewus maak van die gevolge van hul toestand, soos tipe-2-diabetes.

“Dis nutteloos om jou boodskap aggressief oor te dra, en mense te verkleineer en te terg. Die beste raad is streng liefde,” het hy bygevoeg.

© Cover Media