Sterre soos Russell Brand en Gwyneth Paltrow besing al maande lank die voordele van meditasie en dit lyk of die Hollywood-gier ook onder gewone sterflinge inslag vind.

Dit help jou stres en angs baasraak, verskerp jou gedagtes, verlaag bloeddruk, verminder pyn weens spanning en gee jou energievlakke en immuunstelsel ’n hupstoot.

Dit klink alles wonderlik, maar as jou werk en huislike en sosiale verpligtinge reeds jou program volmaak, hoe sit jy tyd opsy om te mediteer? Hier is ’n paar nuttige wenke:

Moenie te veel aanpak nie

Die meeste mense dink meditasie beteken minstens 20 minute kruisbeen sit met jou vingers op jou knieë terwyl jy “om” dreunsing. Dit is dalk hoe dit in die rolprente is, maar dit is die vinnigste manier om jou goeie voornemens te laat vervaag. As jy ’n lang meditasiesessie by jou werkdag probeer inpas, sal jy waarskynik gou handdoek ingooi. En as jy eers een sessie oorgeslaan het, raak dit al hoe makliker om van jou meditasieplan af te sien. Dis veel beter om jouself te beloof jy sal drie minute per dag mediteer en dan daarby te hou. Wanneer jy eers in ’n roetine is, sal jy waarskynlik in elk geval langer wil mediteer.

Roetine

Dit behoort maklik te wees, want die meeste van volg in elk geval elke dag ’n roetine. Dit sal vir jou makliker wees om met meditasiesessies vol te hou as jy dit elke dag op dieselfde tyd en plek doen. Maak die plek knus – steek ’n kers of wierook aan. ’n Mantra kan ook help, want dit is nog ’n manier van roetine skep.

Stel jou gedagtes oop

Jy kan in ’n vertrek in jou huis mediteer, maar nie almal kry dit reg nie. As die druk om te konsentreer vir jou te veel is, kan oefening die deurslag gee. Meditasie gaan daaroor om jouself te sentreer en vir party mense is die beste tyd om die dag opsy te skuif wanneer hulle draf of stap. Vanessa Loder het aan Mind Body Green gesê dit kan help om op jou asemhaling te konsentreer. Tel jou teue wanneer jy in- en uitasem, en gebruik dit as ’n manier om bewustelik te wees.

Kry ’n maat

Die bewustheidskenner Katie Hendricks beveel die oefening Loop of Awareness aan. Jy het ’n vriend of maat of jou kind nodig om dit te doen. Laat die persoon oorkant jou sit met hul gesig na jou en konsentreer op jou asemhaling terwyl jy na hulle kyk en tot drie tel. Doen dan dieselfde, maar konsentreer op die styging en daling van jou maat se borskas. Hou ’n paar minute daarmee vol, en onthou om oor jou omgewing te dink, soos jou stoel of enigiets anders waaraan jy raak.

© Cover Media