Ly jy aan slaapgebrek?

Hoewel jy altyd sal weet as jy aan slaaploosheid ly, is ander oorsake van ’n gebrek aan slaap, soos daardie drankie voor bedtyd, dalk nie so maklik waarneembaar nie.

Hier is ’n paar algemene simptome van ’n gebrek aan slaap. 

As jy ja antwoord op twee of meer hiervan, ly jy dalk aan ’n gebrek aan slaap.

  • Voel jy deur die dag vaak en geïrriteerd?
  • Sukkel jy om wakker te bly wanneer jy stilsit, TV kyk of lees?
  • Raak jy vaak of voel jy baie moeg terwyl jy bestuur?
  • Sukkel jy om te konsentreer?
  • Sê mense dikwels jy lyk moeg?
  • Reageer jy stadig?
  • Sukkel jy om jou emosies te beheer?
  • Voel jy omtrent elke dag lus vir ’n middagslapie?

Moet jy drankies met kafeïen drink om jou bedags aan die gang te hou?

Probeer die leefstylverandering om jou beter te laat slaap: 

  • Gebruik minder suiker. Dis nie net kafeïen wat jy naby slapenstyd moet vermy nie. Suikerryke kos en verfynde stysel funksioneer ook as stimulante en moet saans ná sewe vermy word.
  • Verdoof die ligte ’n uur voor jy in die bed klim sodat jou liggaam hom op rus kan voorberei. Sodra jy in die bed is, maak seker jou kamer is so donker moontlik sodat die slaaphormoon melatonien kan inskop en jou lekker laat slaap.
  • Oefen meer. Mense wat gereeld oefen, slaap beter as diegene wat dit nie doen nie.
  • Neem ’n warm bad twee uur voor slapenstyd. Wetenskaplikes het bevind jou liggaamstemperatuur het ’n groot invloed op hoe vinnig jy aan die slaap raak. ’n Goeie nagrus volg gewoonlik nadat die liggaamstemperatuur effens gedaal het.
  • Voeg meer voedsel wat triptofaan bevat by jou dieet. Dit is bekend dat hierdie aminosuur die melatonienvlak verhoog. Dit sluit in vis, beesvleis, maaskaas, eiers, sojaproteïen, pampoen- en sesamsaad, heelkoring, aartappels, piesang, lensies en vye.
  • Kry ’n nuwe bed of matras. Ná ses tot 10 jaar het jou matras se gehalte dalk met tot 70 persent agteruitgegaan.
  • Skakel die TV en jou selfoon af, want hulle stimuleer jou brein. Dit sal jou dalk help om aan die slaap te raak, maar jy sal onrustig slaap.
  • Moenie skape tel nie, want dit kan die proses van aan die slaap raak net ingewikkeld maak. Probeer liewer in die oomblik wees.
  • Let op na die sensasie van die kussing onder jou wang en hoe jy in- en uitasem. Dié tegniek sal ook help as jy jou in die middel van die nag oor dinge lê en bekommer.
  • Hou ’n slaapdagboek. Om rekord te hou van jou slaappatrone sal jou help om problem met slaap te identifiseer waaroor jy dalk nog nie gedink het nie en sal nuttig te pas kom as jy ’n dokter daaroor besoek.
  • Probeer kognitiewe terapie. Jy het dalk onderliggende probleme waaroor jy bekommerd is en terapie kan jou help om dit te verwerk.