Dis belangrik om jou fiksheidsroetine te verbeter as jy graag jou droomlyf wil bereik. Maar almal wat al ernstig geoefen het, weet mos nou al: as jy hard werk in die gim, neem jou aptyt ook toe.

Al tyd wanneer jy werklik jou kilojoule-inname moet verhoog, is wanneer jy intensief oefen vir iets spesifieks, soos ’n kompetisie of ’n marathon.

As jy slegs oefen om gewig te verloor, is dit belangrik dat jy nie al die goeie werk ongedaan maak deur meer te eet nie. Hier is ’n paar wenke om op koers te bly.

Hou jou kilojoules dop

As jy sekere dae van die week uitsonder vir oefening, is dit maklik om jouself te vertel dat daardie ekstra koekie in die haak is, want jy gaan dit later afwerk. Dit sal ongelukkig net al jou harde werk ongedaan maak en dit sal beteken dat jy geen verandering in jou gewig sal bemerk nie.

Gebruik ’n app om ’n kilojouleteiken vas te stel wat gegrond is op jou huidige gewig en lengte en jou teikengewig, en bly dan daarby – selfs op oefendae.

Jy moet meer kilojoules verbrand as wat jy inkry, anders gaan jy geen vordering maak nie. Maar gesels met ’n dieetkundige by jou gim sodat jy nie dalk te min eet nie.

Kies die regte kosse

Party voedselsoorte bestaan uit leë kalorieë, met suikerhappies as een van die beste voorbeelde. Jy mag nou wel aanvanklik meer energiek voel, maar jy sal gou weer honger raak en jy sal nie die oefensessie kan voltooi sonder nog ’n happie nie.

Maak seker daar is ’n goeie balans in jou dieet tussen vesel, goeie vette, vrugte en groente, proteïene en komplekse koolhidrate.

Dit sou ideaal wees as jy hulle almal by elke maaltyd kon insluit. Voedselsoorte, soos volgraanbrood, maer vleis en vis, eiers en avokado sal jou langer help versadig voel en dit beteken dat jy meer energie sal hê om hard te oefen.

Eet op die regte tyd

Beplan jou oefensessies rondom jou maaltye. As jy vroeg uit die vere is, geniet ’n smoothie wat sowat 650 kilojoules bevat voor jy die gim aandurf en dan vul jy dit aan met ’n verstandige ontbyt ná die sessie.

As jy verkies om saans te oefen, beplan jou aandete vir net ná die oefensessie. So sal jy kan uitsien na jou kos en nie benewens jou gereelde maaltye, nog peusel ook nie.

Maar onthou: as jy bewerig voel gedurende oefening, eet jy nie genoeg nie. Gesels met ’n dieetkundige en werk ’n plan uit wat spesifiek vir jou en jou teikengewig werk.

© Cover Media