Oefening is net so nodig soos die regte dieet as jy jou lyf wil gereed kry vir jou bikini.

Om jou eetplan op te knap, is maklik: versamel resepte vir gesonde maaltye (en laat staan sjokolade!). Maar dit verg ’n bietjie meer moeite om jou liggaam op te knap.

Oefening het regtigwaar beplanning nodig, of jy nou douvoordag opstaan om die sypaadjies aan te durf of geld uitgee aan duur lidmaatskap by die gym. Maar hoekom versterk jy nie jou spiere tussen kardio-oefeninge voor die televisie nie?

As jy die rusbank vir die vloer verruil, kan jy in jou eie huis doeltreffende oefeninge doen en alles opknap – van bingo-arms tot jou agterstewe.

Maag

As jy slaafs elke dag opsitte doen, sal jou maagspiere beslis bult, maar ook net as jou magie in elk geval plat is. Slaafse opsitte sal nie jou magie plat maak nie, maar as jy jou kern oefen, sal dit ’n uitwerking begin hê. Pleks van opkrul-oefeninge (“crunching”) kan jy plank-oefeninge voor die televisie doen.

Begin deur die tradisionele plankposisie vir 60 tot 90 sekondes te hou voor jy aanbeweeg na meer gevorderde bewegings, soos die sywaartse plank en om elke arm en been beurtelings te lig. Hou jou maagspiere die hele tyd ingetrek.

Agterstewe

Hurk is ’n fantastiese oefening vir jou agterstewe sowel as jou bene. Die plié-hurkbeweging is veral goed om jou agterstewe ferm te hou. Staan met jou voete effens wyer as skouerwydte uitmekaar, met jou tone uitwaarts gepunt, en strek jou arms voor jou uit. Hurk nou so laag moontlik en hou jou stuitjie ingetrek sodat dié deel van jou liggaam werklik kan werk. Lig jou lyf op tot by die beginposisie en herhaal ’n minuut lank.

Arms

Verban bingo-vlerke, wat beteken jou triseps moet oefening kry. Lê op jou rug, met ’n handgewig in elke hand, jou knieë gebuig en jou voete plat op die vloer. Fokus op een arm op ’n slag en beweeg jou arm heeltemal op en oor jou kop. Herhaal 15 keer voor jy die arms omruil.

Bene

Spronge, soos hurkoefeninge, is goed vir jou agterstewe sowel jou bene en dit is een van die maklikste oefeninge om tuis te doen. Staan met jou bene gesprei, die een been vorentoe, en buig jou knieë in ’n sprongposisie sodat albei bene reghoeke vorm. Nou kan jy in die posisie bly of regop kom en jou bene wissel om ’n ander diep sprongposisie in te neem. Herhaal ’n minuut lank, rus en doen nog drie stelle van die oefening.

© Cover Media