Meisies wie se ouers of maats hulle op 10 jaar as “te vet” uitkryt, is minder geneig om te verslank en het ’n groter risiko om eendag vetsugtig te wees, is in ’n Amerikaanse ondersoek bevind.

Wetenskaplikes aan die Universiteit van Kalifornië het data oor liggaamsmates en liggaamsmassa-indeks (LMI) van amper 2 400 meisies van 10 jaar oud versamel.

Hulle het die kinders ook gevra of hul ouers, sibbe, maats, klasmaats of onderwysers al eenkeer of herhaaldelik gesê het hulle is te vet. Toe die meisies 19 was, is hul LMI weer gemeet.

Die uitslag: As ’n familielid die 10-jarige as te vet beskryf het, was die kind se risiko 62 persent hoër vir vetsug op 19. As kennisse buite die gesin die opmerkings gemaak het, het die waarskynlik met minstens 40 persent toegeneem.

Dit het nie verband gehou met hul LMI nie. Selfs meisies met ’n normale gewig was meer dikwels later in hul lewe oorgewig as hulle kleintyd neerhalende aanmerkings oor hul figuur moes aanhoor.

Die navorsers se gevolgtrekking is dat die stigmatisering nie daartoe lei dat die meisies hul gedrag aanpas nie, maar dat hulle nie hul gedrag kan aanpas en hul gewig beheer nie.

En die meisies hoef nie eens geterg te word nie – selfs net die oënskynlik onskadelike klassifikasie van “te vet” wees is genoeg.

Welstand verminder en spanning neem toe. Die meisies leer dalk ook ’n vrees vir diskriminasie aan, waarvoor hulle vergoed deur meer te eet.

Bron : Sapa-dpa /nsm