Jy kan maklik verlore raak in die wonderlike wêreld van Pinterest – veral by die afdeling oor kos en drankies. En as jy enigsins soos ek is, sal jou maag op die ou end behoorlik grom – jy sal smag na ’n stuk pastei gemaak van koekies met sjokoladebrokkies of spek-en-mielie-plaatkoekies ná ’n besoek aan die kos-kategorie op Pinterest.

Maar vir elke Oreo-kaaskoek is daar iets vir diegene wat gesonder wil leef. Probeer dus elke dan en wan om jou weg te skeur van die kaloriebelaaide lekkernye en gaan kyk ’n bietjie wat ons onder gesondheid en fiksheid gekry het – dis net so interessant soos om na sjokoladebruintjies te soek.

Hier is ’n paar dinge wat ek daaruit geleer het. En dit het my genadiglik nie laat voel ek moet ná werk sjokoladebrokkies, roomkaas of spek gaan koop nie.

Slaaie is nie vervelig nie

Vandat ek jare gelede op die sjef Jamie Oliver verlief geraak het, probeer hy my dit al wysmaak, maar ek het hom nooit geglo nie. Ek is nie mal oor slaai nie – dis koud, waterig, smaakloos en onbevredigend.

Maar een kykie na dié eenvoudige slaai met komkommer, avokado, mango en lemmetjie het my ’n bietjie hoop gegee dat ek meer voedingswaarde in my dieet sal kry. Dit klink sappig en soet.

Bestanddele

15-25 ml (3-5 t) vissous

5 ml (1 t) vars gerasperde lemmetjieskil, en nog vir versiering

30 ml (2 e) lemmetjiesap

15 ml (1 e) kanola-olie

10 ml (2 t) ligbruinsuiker

5 ml (1 t) rysasyn

2 ml (¼ t) gekneusde rissie

1 middelslag-komkommer, in blokkies gesny

1 avokado, in blokkies gesny

1 mango, in blokkies gesny

60 ml (¼ k) gekapte koljander

vars cilantro

Metode

Klits die vissous na smaak, skil, sap, olie, bruinsuiker, asyn en rissie in groot bak saam tot goed gemeng. Voeg die komkommer, avokado, mango en koljander by en meng. Sit voor saam met die lemmetjieskil (indien verkies).

Appels is lekker peuselhappies. Regtig.

Wanneer iemand op kantoor sê hulle is lus vir sjokolade of iets met ewe veel kalorieë, stel ons altyd grappenderwys voor dat hulle eerder ’n appel eet. Dit word gewoonlik met ’n vuil kyk begroet. Dis snaaks, want wie geniet tog nou ’n appel teenoor, byvoorbeeld, ’n pakkie jellielekkers wanneer hulle hier teen 15:00 begin lus kry vir peusel? Maar dié idees het my inspireer. Dis nuttig as jy jou gewig of gesondheid dophou. Ek stel voor:

Gebakte appelskywe: Sny ’n appel in skywe, bedek met ’n bietjie suiker en kaneel en bak tot goudbruin!

’n Heel gebakte appel: Verwyder die stronk en vul dit met hawermeel, neute en ’n bietjie heuning. Bak tot sag.

Appeltoebroodjies: Meng muesli en grondboontjiebotter en smeer dit tussen twee dik appelskywe.

Geen skuldgevoelens oor kolwyntjies

Ek is versot op kolwyntjies. Boonop kan ek nooit net een eet nie en sit dan met hope energie weens die suiker en selfs nog meer skuldgevoelens, wat net nog ’n kolwyntjie natuurlik kan regmaak. Maar daar is ander opsies! Is dié gevriesde joghurt nie oulik nie? En kyk hoe gesond is die bestanddele!

Gevriesde joghurt

Lewer 12 porsies.

Bestanddele

250 ml (1 k) laevet-vanielje-joghurt

8 aarbeie

’n halwe ryp piesang

5 ml (1 t) mini-sjokoladebrokkies

Metode  

Sit 12 mini-silikoonbakvormpies -op ’n skinkbord of klein houtsnybord.

Vul elke houer tot in die helfte met die joghurt.

Verwerk die aarbeie en die piesang tot ’n fyn puree. Voeg ’n klein lepel by elke houer sodat geen wit sigbaar is nie.

Skep die laaste bietjie joghurt in elke houer. Strooi ’n paar sjokoladebrokkies bo-oor. Plaas die bord vir sowat ’n uur in die vrieskas.

Verwyder en laat dit vir 10 minute ontdooi voor jy dit eet.

Sjokolade verskil

Wie weet wat skuil alles in ’n sjokoladestafie? Wanneer ek lus kry vir sjokolade, verkies ek die ware Jakob. Ek maak dit ook eerder self as om ’n suikerbelaaide stafie te eet – dit bevat minder kilojoules en het ’n paar voordele. Ek is mal oor hierdie idee:

Donkersjokolade-neuthappies

Bestanddele

295 ml (1 k en 3 e) gesmelte donkersjokolade

gedroogde kersies (opsioneel)

375 ml (1½ k) heel amandels

’n hand vol klapperskaafsels

Nota: Die porsiegrootte is vir gesmelte sjokolade. As jy dus die stukke vooraf afmeet, het jy meer sjokolade as die gemelde hoeveelheid nodig.

Metode

Voer ’n bakplaat met bakpapier uit. Begin deur die sjokoladestukke op lae hitte in ’n pan te smelt; dit sal nie lank neem om te smelt nie. As jy ’n soet kersiesmaak soek, gooi ’n hand vol kersies in die pot wanneer die sjokolade gesmelt is.

Plaas een teelepel gesmelte sjokolade op bakpapier; gooi ’n klein hand vol amandels oor en laat drup een eetlepel gesmelte sjokolade bo-oor. Herhaal die proses met oorblywende amandels en sjokolade tot jou pan vol is.

Strooi die klapperskaafsels oor elke heerlike happie.

Sit dit sowat 10 minute in die yskas om af te koel en haal uit as dit styf is. Dit sal reg wees om dadelik te geniet!

Ek kan dit nie alleen doen nie

As jy enigsins soos ek is, sal motiverende aanhalings eerder as statistiek oor vetsug jou ’n gesonde ete bo macaroni-en-kaas vir aandete laat kies of oorreed om te gaan draf of stap.

As ek ’n bietjie aanmoediging of herinnering nodig het oor hoekom ek gesonder wil wees, is dit maklik om by Pinterest aan te meld en dit te vind. Hier is twee van my onlangse gunstelinge.

Ek kan nie ‘dis te koud om te oefen’ ignoreer nie

Daar is hope vinnige maniere om jou oefening vir die dag in te werk. In die winter is dit goed om oefeninge te kies wat jy binne kan doen. Druk dié program uit, plak dit op jou muur en doen dit! Ek het ’n ruimte in ’n spaarkamer by die huis waar ek soms oefen. Dit is die ideale plek om sulke riglyne op te plak.

Die “Anywhere”-oefeninge

Vinnige oefeninge wat op hul eie of saam met kardio-oefeninge kan werk.

Maandag

30 sekonde plank (regs)

30 sekonde plank (links)

30 sekonde plank (middel)

10 afsakke aan elke kant (2 stelle)

10 burpees

Dinsdag

10 opstote

30 krulle (2 stelle)

10 burpees

30 sekonde plank

10 afsakke aan elke kant

Woensdag

10 afsakke aan elke kant (2 stelle)

60 sekonde plank

30 krulle

10 opstote (2 stelle)

30 fietsry-oefeninge

Donderdag

10 opstote

30 fietsry-oefeninge

10 burpees

60 sekonde plank

10 afsakke

(Herhaal die stel oefeninge.)

Vrydag

20 burpees

10 opstote

10 afsakke aan elke kant

30 fietsry-oefeninge

60 sekonde plank

Saterdag

5 afsakke aan elke kant

10 opstote

10 burpees

(Herhaal die stel oefeninge x3.)

Sondag

Rus tot volgende week!