Dit is nie maklik om weer in 'n oefenroetine te kom nadat jy geboorte geskenk het nie, veral as jy op twee stoele sit: die behoefte om jou figuur terug te kry en dié om fiksheid op die lange baan te skuif.

Wanneer die tyd ryp is, moet jy egter seker maak dat jy dinge teen 'n stadige pas neem, aangesien jy nie nog meer skade wil aanrig nie. Begin met 'n paar van hierdie eenvoudige bewegings totdat jy gereed is vir moeiliker oefeninge.

Eenbeensirkels

As jy jou heupe op die vloer hou wanneer jy hierdie oefeninge doen, sal jou maagspiere geteiken word. Lê op jou rug op die vloer, met jou arms langs jou sye, die handpalms na onder en strek die een been in die lug op.

Terwyl jy hiermee besig is, trek jy jou maag in sodat dit plat lyk. Met jou been in die lug, maak asof jy 'n bord op jou groottoon balanseer en draai dit in die rondte sodat dit in die lug bly. Jy sal voel hoe jou maagspiere saamtrek soos jou liggaam begin om sterker te word.

Lees ook: Om ouer ma te word is moontlik gesonder

Kniebuigings terwyl jy loop

Kry jou bene en jou agterstewe weer in hul oorspronklike vorm met hierdie beweging. Staan regop, met jou hande op jou heupe en jou voete reguit, en maak seker dat jou liggaam reguit is. Neem 'n groot tree vorentoe met die een been, terwyl albei knieë in 'n 90-grade-posisie gebuig is. Soos jy vorentoe beweeg, druk op die hak van jou gestrekte been om jouself terug te stoot in die posisie waarin jy begin het. Daar word aanbeveel dat jy met 10 – 20 herhalings per dag begin, in stelle van een tot drie.

Kniel en lig die bekken

Soos die naam aandui, moet jy op die vloer kniel. Maak seker dat jou tone aan die vloer raak en jou arms reguit is van jou skouerlyn af. Jou handpalms moet aan die vloer raak en jou rug moet in 'n reguit, gemaklike posisie wees. Trek jou asem stadig in en trek jou sitvlak vorentoe, terwyl jy jou bekken effens kantel. Hou die posisie vir drie sekondes (vyf as jy braaf is), asem uit en herstel jou posisie.

Lees ook: Meer seks gee mans se vrugbaarheid ’n hupstoot

Kegeloefeninge

Hierdie oefening is ook gerig op jou bekkenspiere, maar dit is 'n bietjie meer geskik vir beginners. Kry 'n bankie of harde rusbank en sit met jou voete skouerwydte van mekaar af en jou hande op jou heupe. Trek jou bekkenspiere stadig in, asof jy knyp om nie toilet toe te gaan nie, en staan stadig op. Hou die posisie en gaan sit weer. As jy dit 'n bietjie moeiliker wil maak, plaas een voet voor jou wanneer jy opstaan, buig jou elmboë en klem jou hande voor jou bors inmekaar. Lig jou voorste been effens van die vloer af terwyl jy die posisie hou, en ruil bene om tussen elke stel van een tot drie herhalings.

© Cover Media