1 Verskeidenheid is die wagwoord

Geniet ’n verskeidenheid kossoorte en eet van elke voedselgroep sodat jy die beste en voedsaamste eetprogram moontlik het. Dit sal ook help dat jy nie gedurig voel jy is nou “op ’n dieet” nie.

2 Bly beweeg

Bly so aktief moontlik. Sluit by die gim aan of gaan stap elke dag met die hond, maar kry iets wat jou pas.

3 Eet stysel

Moenie luister na dieetplanne wat jou aansê om stysel of koolhidrate uit te skakel nie; dis nie ’n goeie idee nie. Koolhidrate verskaf onmiddellike energie en is nodig om ons metabolisme op sy beste te laat werk.

4 Laat waai met vrugte en groente

Kenners beveel aan dat ’n mens elke dag ’n minimum van vyf porsies vrugte of groente eet. Dit sal jou versadig laat voel en jou van daaglikse noodsaaklike vitamiene en minerale voorsien.

5 Eet jou bone

Jy behoort gereeld bone, ertjies, lensies en soja te eet. Dis uitstekende bronne van koolhidrate, vesel en proteïen.

6 Eet elke dag proteïen

Eet elke dag klein hoeveelhede hoender, vis, vleis, melk of eiers. Maak seker elke porsie is nie groter as die palm van jou hand nie.

7 Stadig met die vette

Dis ’n mite dat jy alle vette moet uitskakel. ’n Gesonde dieet behoort ’n Klein hoeveelheid vette in te sluit, verkieslikgesonde vette wat te kry is in avokado’s, olyfolie en neute.

8 Versigtig vir versteekte suiker

Lees die etikette op voedselprodukte en drankies om te sien hoeveel suiker dit bevat, want suiker kan enige gesonde eetprogram maklik laat ontspoor. ’n Voorbeeld van versteekte suiker in ’n oënskynlik gesonde produk is gegeurde mineraalwater.

9 Hou soutinname dop

Baie verwerkte kos en drankies bevat baie meer sout as wat jy dink. Dit sluit selfs brood in! Te veel sout in jou dieet maak jou kwesbaar vir hoë bloeddruk, wat ’n groot gesondheidsgevaar is.

10 Drink baie skoon, veilige water

Behoorlike hidrasie het ’n uitwerking op aptyt en help vetneerslae verminder. Jy behoort te mik na sowat 1½ tot 2 liter per dag. Gegeurde water, tee en koffie tel nie omdat dit kilojoules bevat.

11 Drink alkohol matig

Alkohol bevat leë kilojoules; ’n vrou moet hoogstens een drankie per dag en ’n man twee drink.

12 Eet elke dag ontbyt

Navorsing toon dat mense wat gereeld ’n gesonde ontbyt eet die meeste gewig verloor en dit nie weer aansit nie. ’n Heilsame ontbyt binne ’n uur nadat jy opgestaan het, skop ook jou metabolisme aan die gang.

13 Hou porsiegroottes dop

Eet liewer kleiner porsies maar eet elke drie tot vier uur iets. Dit gee jou reëlmatige energie en laat jou metabolisme op sy beste werk.

14 Moenie te kort voor slaaptyd eet nie

Eet jou laaste maaltyd minstens twee tot drie uur voor jy bed toe gaan. So verteer jou kos voor jy gaan slaap sodat jou lyf in die nag daarop kan konsentreer om himself te verfris en herstel eerder as om kos te verteer.

15 Eet lae GI koolhidrate

Kos met ’n lae glisemiese indeks sluit in hoëvesel-koolhidrate wat jou drie tot vier uur lank versadig sal hou tot dit tyd is om weer te eet.

16 Drink suiwel

Baie studies toon ’n verband tussen laevet-suiwel en gewigverlies. Kry daagliks ’n minimum van drie porsies laevet- produkte in.

17 Eet en drink laevet of vetvry

Laevet- en vetvrye kosse is ’n gesonde deel van ’n gewigverliesdieet omdat kos wat baie vet bevat, dikwels ook van suiker en kilojoules wemel. Kos wat as hoog in vet beskou word, bevat gewoonlik ook baie versadigde en transvette wat slegte vette is en jou nie net vet maak nie; dit verhoog ook jou cholesterolvlak en vergroot jou risiko vir hartsiektes.

18 Eet gesonde peuselhappies

Dis onvermydelik dat jy in ’n stadium lus sal word vir iets om aan te knibbel. Sorg dus dat jy gesonde peuselhappies byderhand het soos vrugte, laevet-jogurt en springmielies of rou groente soos wortelrepies of seldery.

19 Wees een dag per week ‘groen’ en sny rooivleis uit

Nie net sal dit verseker dat jy jou daaglikse porsie van vyf vrugte en groente inkry nie, maar as jy minstens een maaltyd per week vegetaries maak, kan jy kreatief raak met die opsies van peule, groente en vis.

20 Bekyk jou yskas se inhoud

Om by ’n gesonde eetplan te hou is moeilik genoeg sonder dat lekkernye in die yskas jou verlei. Maak seker jou yskas is net vol gesonde kos soos laevet-jogurt, vars vrugte en groente voor jy jou dieet aanpak.

21 Slaap genoeg

Navorsing wys dat mense wat ’n gemiddelde sewe tot agt uur per nag slaap, meer sukses het om gewig af te skud en dit so te hou as dié wat minder ure per nag slaap. Probeer dus vroeg bed toe gaan en verseker dat jy so gereeld moontlik ’n goeie nagrus inkry.

22 Bestel voorgeregte as hoofgeregte

Om uit te eet kan ’n mynveld vir mense op dieet wees omdat restaurantporsies dikwels baie groter is as wat jy tuis sou voorsit. Eet die helfte en neem die res huis toe, of bestel twee voorgeregte eerder as een hoofgereg.

23 Hou 'n kosjoernaal

Studies wys verslanking word aangehelp as jy boekhou van wat jy elke dag eet. Jy sal beslis dink voor jy iets eet en ook sien waar die ekstra kilojoules vandaan kom.

24 Hou op wanneer jy versadig is

Wees bewus van hoeveel jy eet en luister na jou liggaam wanneer hy vir jou sê hy is versadig. Die geheim is om op te hou eet voor jy oorvol of ongemaklik voel.

25 Beplan jou etes

Een van die beste maniere om seker te maak dat jy by jou dieet bly is om jou eie kos te maak en jou etes behoorlik vooraf te beplan. Beplan vier maaltye per week en eet die oorskiet die ander aande.

5 DIEETFOUTE

Hier is vyf algemene dieetstrikke waarin baie mense trap, waarsku Dianne Ivison, ’n geregistreerde dieetkundige van Kaapstad.

  • Beloftes van “met dié dieet kan jy binne ’n week 4 kg afskud”. As dit te goed klink om waar te wees, is dit waarskynlik. Daar is geen kitsoplossing vir ’n langtermynprobleem nie. Maak klein, volhoubare veranderings aan jou eetgewoontes.

  • Die beginsel van “die dieet het vir my vriendin gewerk”. Een grootte pas nie almal nie. Moenie deur mense beïnvloed word nie en raadpleeg altyd eers jou dokter of ’n dieetkundige voor jy met iets nuuts begin.

  • Die idee dat inspuitings, dieetskommels en pille alleen vinnige gewigverlies meebring. Niks hiervan werk sonder ’n gesonde eetplan en oefenprogram nie.

  • Die voorneme om jou elke dag te weeg. Dit sal aan die begin lyk of jy vinnig gewig afskud, maar dis danksy ’n verlies aan water. Die waterinhoud van jou lyf kan elke dag wissel, wat jou gewig sal raak. Klim liewer net een keer per week op die skaal.

  • Die voorneme om net ’n maand lank op ’n dieet te wees. Dis die grootste fout wat mense maak. Diëte werk nie, dis leefstylveranderings wat werk