VS is ’n neurologiese siekte wat die liggaam se sentrale senustelsel aantas. Dit raak twee keer soveel vroue as mans en veroorsaak beweeglikheids- en sigprobleme, moegheid en verskriklike pyn. Dit is ongeneeslik en kan mettertyd vererger. Daar is egter nou ’n nuwe middel wat hoop bied aan die 2,3 miljoen mense wêreldwyd wat met die siekte moet saamleef.

Die medikasie is die eerste waarmee ’n soort VS bekend as primêre progressiewe VS behandel kan word, en dit bied aan nog 85 000 VS-pasiënte ’n doeltreffender alternatief vir bestaande geneesmiddels.

Ocrelizumab is die heel eerste soort middel wat doeltreffend is in die behandeling van die 10 persent van VS-pasiënte met primêre progressiewe VS. Wetenskaplikes noem dit die “spelwisselaar” en dit kan ook die 85 persent van pasiënte help wat aan ’n ander vorm van die siekte, genaamd terugkerende VS, ly. In laasgenoemde geval is bevind dat ocrelizumab 50 persent doeltreffender as die huidige medikasie is. Die middel is in ’n kliniese proefneming in hospitale oral in die VK getoets.

VS kom voor wanneer die liggaam se immuunstelsel onklaar raak. Dit raak twee keer soveel vroue as mans.

VS kom voor wanneer die liggaam se immuunstelsel onklaar raak. Pleks van siektes afweer, val immuniteitselle, wat B-selle genoem word, die liggaam se miëlien, die beskermende skede om senuvesels, aan. Die behandeling met ocrelizumab verlangsaam hierdie proses deurdat dit keer dat die B-selle die miëlien aanval.

Prof. Gavin Giovanni van die Barts-hospitaal in Londen sê: “Die feit dat die B-selle geteiken kan word, kan die siekte aansienlik verander en beteken in werklikheid ’n positiewer vooruitsig vir pasiënte”.

Die middel word elke ses maande in die vorm van ’n binneaarse drup toegedien. Die medisynemaatskappy Roche beplan om vroeg aanstaande jaar by die Europese Medisyne-agentskap aansoek te doen vir ’n lisensie vir ocrelizumab. As dit goedgekeur word, kan dit reeds teen 2017 aan aan pasiënte beskikbaar gestel word.

© Cover Media