“Ek kan nie meer so aangaan nie. Die lig aan die einde van die tonnel is vir altyd vir my uitgedoof. Daar is eenvoudig nie meer hoop nie. Goeie nag en tot siens . . .”

Hierdie woorde laat ’n mens se nekhare rys. Wil dié Facebook-vriend dalk sy lewe neem? Wat doen ek nou? “In Suid-Afrika is daar is elke liewe dag 23 selfdoodgevalle en nog 460 selfdooddoodpogings elke 24 uur,” sê Cassey Chambers van die Suid-Afrikaanse Depressie-en-angsgroep (Sadag).

Vrydag bied Sadag Facebook Friday aan, waar gekweldes om 13:00 en 19:00 regstreeks met kenners kan praat (gaan kyk op sadag.org vir nog inligting).

Facebook het dié organisasie sonder winsbejag gekies om hul nuwe keuse-opsie in Suid-Afrika te bestuur. Facebook verbind 1,6 miljoen mense en dis die plek waar gesprekke dikwels weerspieël waaroor mense dink en praat.

Nuwe navorsing deur Facebook toon ongeveer ’n derde van boodskappe wat op hierdie webtuiste gedeel word, sluit negatiewe gevoelens in.

Lees ook: Jou kinders en depressie

Hierdie soort inskrywings ontvang langer en meer kommentaar met meegevoel as ander boodskappe. “Mense wil vriende in nood help, maar weet dikwels nie hoe om dit te doen nie,” sê Vanessa Callison-Burch, Facebook-woordvoerder.

Nou het Facebook opsielyste waarop jy kan klik om ’n vriend by te staan wat hom- of haarself moontlik wil leed aandoen. Jy kan byvoorbeeld ’n boodskap aan dié vriend stuur of ander vriende opkommandeer om te help.

Lees ook: Simptome van depressie

Facebook stel ook boodskappe voor wat jy in so ’n situasie kan stuur. Dis saamgestel deur professionele mense soos sielkundiges. Jy ontvang ook die kontakbesonderhede van plekke waar die mens kan aanklop.

Dis waar Sadag se rol baie belangrik word. In 20 jaar het hulle ’n databasis opgebou van die beste plaaslike kenners op die gebied van selfdoodvoorkoming. Cassey sê: “Ons kan mense met selfhelpwenke bemagtig en hulle raad gee oor hoe om negatiewe gevoelens te verwerk.”

As jy hulp nodig het, bel Sadag se selfdood-krisislyn by 0800-567-567 of stuur ’n SMS na 31393.