Jou keel trek toe. “Dit voel asof jy nooit weer kop bo water gaan hê een finansieel weer kan asemhaal nie,” vertel Wicus Bruwer* (42) van Kaapstad.

Hy het twee kredietkaarte op sy naam: Op die een skuld hy R35 500 en betaal sowat R390 rente elke maand. Die ander een staan op R59 000 en hy dok minstens R770 rente per maand op.

“Dit voel asof dié geld verdwyn in ’n bodemlose put waaruit ek nie gaan kom nie. Sodra ek ’n redelike bedrag afbetaal het aan dié twee kaarte, dan kom daar weer ’n moeilike tyd waartydens ek die krediet weer heeltemal uitput en van vooraf moet begin.”

Wicus is beslis nie al wat hiermee sukkel nie. “Verbruikerskuld is buite beheer,” vertel Gerald Mwandiambira van die Suid-Afrikaanse Spaarinstituut.

Lees ook: Begroot só wanneer jy noustrop trek

“Die gemiddelde skuld per huishouding in Suid-Afrika met minstens een kredietkaart is driekwart van die huishouding se uitgawes– en dit hou aan styg,” voeg Gerald by.

“Die ideaal is om jou maandelikse aankope met jou kredietkaart te betaal en dit ten volle te betaal voor jy rente begin betaal, gewoonlik 30 of 60 dae. Die transaksiekoste is soms ’n bietjie laer as ’n tjek- of spaarrekening s’n, maar daar is ook jaarlikse kaartfooie,” waarsku Louis van der Merwe, ’n geakkrediteerde finansiële beplanner van Durbanville.

Om te help om tred hou van hoeveel jy bestee en ook om die ware koste te sien, stel Louis voor jy gebruik Suid-Afrikaanse apps soos 22seven.com of moneysmart.co.za.

Jy kan jou bankrekeninge koppel en al jou uitgawes (insluitend die hoeveelheid rente en bankkoste) daar op een plek sien.

Rentekoerse op kredietkaarte is veel hoër. Op kredietkaartskuld van R10 000 sal jy byvoorbeeld nou teen ’n koers van 20,25 persent oor ’n sesmaandetydperk maandeliks sowat R2 026 aan paaiemente betaal. Rentekoerse kan taamlik wissel van kliënt tot kliënt.

Lees ook: Ruim op en spaar geld

Jy kan jou bank vra of jy minder op jou kredietkaartskuld kan afbetaal. Jy het dalk ’n goeie risikoprofiel of dalk het dit darem verbeter. Dit sal bepaal of hulle ’n laer koers sal toestaan.

Vergelyk die verskillende kaarte wat jou aangebied word deur winkels of kredietkaartmaatskappye. (Visa en MasterCard is maatskappye wat met dié betaalmetode help; hulle reik nie kaarte uit nie.)

Die beste manier om aansoek te doen om ’n rekening is om kaarte met die beste tariewe te kies, sê Lita Epstein, skrywer van The Complete Idiot’s Guide to Improving Your Credit Score.

Gaan loer in by justmoney.co.za se kredietkaart-bladsy vir n vergelykende berekenaar vir nog inligting hieroor.

Wat is die belangrikste punte wat jy in gedagte moet hou, voor jy ’n kredietkaart kry?

Voordele:

  • Jy kan ’n kredietkaart oral gebruik, veral oorsee, maar maak net seker wat die koste daaraan verbonde is.
  • Dit help jou met makliker inkopies telefonies of aanlyn.
  • In noodgevalle bied dit ’n finansiële vangnet, soos wanneer jy onverwagte gesondheidsorg-uitgawes het, jy jou werk verloor of motor moet laat herstel.
  • Jy kan iets koop en dit maandeliks afbetaal. Daar is selfs afslag by sekere winkels en jy kry dikwels punte of geld terug as beloning. Punte kan jy byvoorbeeld gebruik om vlugkoste te betaal.
  • Hoe jy jou kredietkaart hanteer help jou om ’n kredietgeskiedenis op te bou en is noodsaaklik as jy dalk later wil geld leen om ’n huis of ’n ryding te koop.
  • Wanneer jy getrou jou kredietkaart afbetaal kan dit help om later hierdie soort geld teen ’n laer rentekoers te leen. Gaan jou krediettelling na by mytransunion.co.za.
  • Met hierdie kaarte kan jy rekord hou van jou uitgawes en help om jou finansiële gedrag beter te monitor omdat jy heeltyd bewus moet wees van jou kredietlimiet en hoeveel rente jy daaraan sal moet betaal.
  • Kredietkaarte help in ’n dispuut oor foute op jou rekening of foutiewe goedere, want jy kan deur jou kredietkaart reël dat betaling dae later weerhou kan word omdat dit ’n rukkie duur tot die geld van hierdie maatskappy oorbetaal word aan die winkel of diensstasie.

Nadele:

  • Sommige verbruikers gee meer geld uit wanneer hulle ’n kredietkaart byderhand het.
  • Jy hou nie by jou maandelikse begroting nie.
  • As jy nie elke maand jou betaling betyds doen nie, kan boetes en rente bly ophoop en jou ál dieper in die skuld dompel.
  • As jy ’n klomp kredietkaarte op jou naam het, kan dit potensiële geldskieters afskrik.
  • Te veel kredietkaarte kan ook jou kredietwaardigheid belemmer.
  • Studies toon kredietkaarte speel ’n beduidende rol in verbruikers se bankrotskap.
  • Kredietkaartbedrog besorg ook baie hoofbrekens.
  • Die kredietkaartkontrak is bindend en as jy dit nie baie sorgvuldig deurgelees het voor jy dit geteken het nie, kan jy jare lank tot daardie skuld verbind wees sonder enige uitkoms.

Moenie met ’n kredietkaart gebruik om:

  • Ander skuld te delg nie.
  • Jou lewenstandaarde te verhoog nie.
  • Items wat nie in jou begroting was nie, aan te skaf.
  • Jou salaris in te betaal nie (want die koste vir elke transaksie kan ophoop).
  • Studiekoste te betaal nie (daar is studielenings wat teen ’n beter tarief verskaf kan word).
  • Iets te koop, waarvoor jy kon spaar en dit kontant kom gekoop het.

Ekstra bronne: Nerdwallet.com, creditcards.com

* Skuilnaam

– Deur Pieter van Zyl

Ander stories op Huisgenoot.com:

‘Vrugte-algebra’ laat internetgebruikers omtrent kopkrap

Minister van geluk streef na glimlagte

K2-tweeling se foto’s gebruik vir aanlyn leuens

Wil jy die versoeking weerstaan? Plaas dan bederfies naby die minder dominante hand

Byna helfte van SA is opgaarders – is jy een?