Eerste, die slegte nuus: Suid-Afrika se verbruikerskuld is die hoogste ter wêreld. As jy dus – soos miljoene Suid-Afrikaners – sukkel om jou skuld getrou af te betaal of ’n lening moes aangaan om die las te verlig, is jy geensins alleen nie.

Nou, die goeie nuus: Daar is hulp; trouens, ’n verskaffer van skuldberadingsdienste verwag dat hulle in 2017 ongeveer 17 000 mense gaan help om uit die skuld te kom en so meer as R100 miljoen aan rente en koste te spaar.

Hier is ’n paar praktiese stappe wat jy dadelik kan begin doen om te keer dat skuld jou verswelg:

  1. Eerste stap: Vra jou af: “Kan ek dit bekostig?” En ons praat nie nou net van jou droomhuis, daardie o so windmakerige motor of vakansie in Bali wat jy beslis verdien nie. Kan jy jou huidige skuld met gemak betaal? Volgens die hoof van een van die skuldbestrydingsadviesdienste, kan 99 persent van die mense wat by hulle aanklop om hulp, dit eenvoudig nie doen nie. Wanneer jy weet presies hoe erg die situasie is, kan proaktiewe begin optree om iets daaraan te doen.
  2. Die volgende stap: Kry ’n kredietverslag sodat jy kan uitwerk presies hoe diep jy in die skuld is. Skuld kan maklik raak soos ’n muwwe toebroodjie in jou paneelkissie: Iets wat jy liewer sou wou vermy. Sodra jy weet presies wat jou skuld behels, kan jy begin planne maak om dit in klein, beheerbare stukkies op te breek wat jy makliker kan betaal.
  3. Hersien jou versekeringspaaiemente jaarliks, of beter nog, elke ses maande. So sal jy nie beter tariewe misloop wanneer hulle opduik nie. Versekering is nou maar eenmaal een van die dinge waarsonder geen verantwoordelike volwassene kan klaarkom nie. As jy dit dus teen ’n tarief kan kry wat die las verlig, soveel te beter.
  4. Wees bewus van watter luukse-uitgawes jy kan laat vaar. Dis waar, ons almal verdien so af en toe ’n bederfie, maar wat die bestryding van ons skuld betref, moet jy weet wat om te laat gaan. Het jy werklik daardie duur lidmaatskap van die gim nodig as ’n drafsessie om die blok of ’n klompie hurksitte in die sitkamer ewe goed sal werk?
  5. Dis vanselfsprekend: Stel ’n begroting op en hou daarby. Maak eerstens ’n lys van jou huishoudelike inkomste, uitgawes, skuld en geld wat oor is – en weeg hulle teen mekaar op. Kyk waar jy ’n bietjie vet kan afsny en gaan daarvandaan verder. As jy praktiese en realistiese maandelikse, weeklikse of selfs daaglikse perke aan jouself kan stel en (die belangrikste) daarby bly, sal ’n skuldvrye bestaan meer bereikbaar wees as wat jy dink.
  6. Moet nooit ’n paaiement oorslaan nie. Sodra jou salaris inbetaal word, betaal eers alles wat jy moet, pleks van om die valse gevoel van ’n vol beursie te geniet.
  7. Moet nooit ’n lening aangaan om bestaande skuld af te betaal nie. Dis een van die grootste foute wat Suid-Afrikaners begaan en dit vererger die skuldspiraal in die meeste gevalle aansienlik.
  8. Leer rentekoerse en inflasie verstaan. Dit is twee van die faktore wat skuld veroorsaak, maar waaroor mense min of geen beheer het nie. As jy eers verstaan hoe hierdie faktore jou in die skuld hou, kan jy jou terugbetalings beter bestuur.
  9. Ken die verskil tussen goeie en slegte skuld. Goeie skuld – ’n huis- of studielening – het ’n positiewe uitwerking op jou geldstatus en voeg waarde tot jou lewe toe op ’n baie tasbare en vervullende manier. Slegte skuld word veroorsaak deur lenings wat kortstondige genot verskaf, asook onnodige luukses.
  10. Lees na oor skuldkonsolidasie en skuldberading sodat jy kan verstaan hoe dit werk. Sodra jy dan weet hoe dit jou uit die skuld kan kry, moet jy met die deskundiges gesels wat jou kan help om die bal aan die rol te kry.

Besoek Debtbusters vir nog wenke en advies oor die manier waarop jy sommer vandag nog kan begin om jou skuld iets van die verlede te maak.