Geen belasting

Ouers kies toenemend belastingvrye spaarplanne vir hul kinders se studie en om kapitaal op te bou waarmee hulle dalk eendag ’n eie onderneming kan begin, sê Niki Giles van Sygnia Asset Management. Die grootste grootste pluspunt van belastingvrye spaarplanne is dat geen dividend-, inkomste- of kapitaalwinsbelasting op die opbrengs betaal word nie. En danksy saamgestelde rente kan so ’n belegging met verloop van tyd behoorlik groei.

Hoeveel dra jy by

Die maksimum beleggingsbedrag is tans R33 000 per jaar, maar jy kan begin met wat jy kan afknyp. Opsies sluit ’n maandelikse debietorder van so min as R250 en enkelbeleggings van sowat R10 000 in.

Die maksimum beleggingsbydrae in iemand se leeftyd is R500 000. As die belegging in jou kind se naam is, is dié syfer op hom of haar van toepassing, nie op jou nie, al betaal jy die bydraes, verduidelik Niki. Jou by draes word dus reeds by jou kind se leeftydlimiet gereken.

Waar spaar jy

Daar is verskeie opsies, soos bankspaarrekeninge, vaste deposito’s en effektetrustfondse. As jy oor ’n lang tyd belê, kan jy meer aggressiewe beleggings kies sodat jou belegging inflasie klop, sê Niki.

’n Voorbeeld hiervan is indeksvolgfondse, wat baie in aandele belê. Daarenteen groei kontantbeleggings soos spaarrekeninge en geldmarkfondse op die duur gewoonlik teen ’n laer koers as inflasie.

Jou geld verloor dan koopkrag. Vergelyk die produkfooie van verskillende maatskappye. Daar mag geen verskuilde koste soos prestasiegeld wees nie.

Onthou dit

Die belegging behoort aan jou kinders as dit in hul naam is. Wanneer hulle 18 word, sal hulle daarmee kan doen wat hulle wil – al het jy dit gespaar. En al het jy die bydraes betaal, sal jy dit nie dan na jou persoonlike rekening kan oorplaas nie. Hou ook boek van hoeveel jy inbetaal, want bydraes wat die jaarlikse perk van R33 000 oorskry, is onderworpe aan belasting van 40 persent.

Leer jou kinders deur jou voorbeeld. Betaal jou rekeninge betyds. Vermy kredietkaartskuld. Voldoen in jou behoeftes, maar leef binne jou middele – SUZE ORMAN, AMERIKAANSE KENNER VAN PERSOONLIKE FINANSIES

5 VRAE OOR SPAAR VIR JOU KINDERS

  • 1 Watter dokumente het jy nodig? Om geld in jou kind se naam te belê, het jy as ouer jou ID en bewys van jou woonadres nodig, asook die kind se geboortesertifikaat.
  • 2 Watter maatskappye bied spaarplanne? Banke, lewensversekereraars, batebestuurders en beleggingsmaatskappye kan help. Die meeste finansiëlediensverskaffers maak dit maklik om aanlyn te belê. ’n Finansiële beplanner kan help om die beste spaarproduk vir jou te kies.
  • 3 Hoe weet die Suid-Afrikaanse Inkomstediens (SAID) dis belastingvry? Diensverskaffers sal die volgende inligting twee maal per jaar aan die SAID verskaf: totale bydraes gemaak, totale onttrekkings en oorplasings, en die totale beleggingsopbrengste soos rente, dividende en kapitaal- wins of -verlies.
  • 4 Wat van skenkingsbelasting? Jy kan jaarliks R100 000 aan iemand skenk sonder om  skenkingsbelasting daarop te betaal. Dit dek dus ook ’n skenking van R33 000 in ’n belastingvrye spaarplan.
  • 5 Wanneer begin die jaar? Dit is die belastingjaar, wat strek van 1 Maart tot einde Februarie van die volgende jaar. Sorg dat jy tussen hierdie datums binne die perke vir skenkings bly.

Belangrik

In die belegging se bewoording moet daar uitdruklik staan die spaarplan is belastingvry, anders is dit nie.

  • Hierdie artikel het oorspronklik in Huisgenoot 22 Desember 2016 verskyn