Die bedrag wat hulle skuld en maandeliks op krediet- en winkelkaarte moet afbetaal, het hom laat vra: “Hoe kan ons hierdie geld beter aanwend?”

1rand-1
Die eenrandgesin besef nou hierdie skuld is meer as ’n maand se huisverbandpaaiement en die rente is uiters hoog. “Korttermynskuld is die duurste, maar ons betaal net die minimum – iets wat ons in die toekoms duur te staan sal kom.”

Hulle geniet nou al die luukshede, maar is dit dalk ten koste van hul toekoms? Vandeesweek kyk ons na verskillende soorte skuld.

Karin Muller, hoof van Sanlam Groeimark-oplossings by Sanlam Persoonlike Finansies, verduidelik die verskil tussen goeie, slegte en lelike skuld.

  • Goeie skuld Dit verbeter jou finansiële stand. ’n Huis- of studentelening is goeie voorbeelde. Al betaal jy rente op die huis, kan jy geld daaruit maak as jy die bate teen ’n wins verkoop. En as jy skuld aangaan vir studie, sal dit jou in die toekoms help om meer te verdien. Maar maak seker jy kan dit bekostig; selfs goeie skuld kan nadelig wees vir jou finansiële welvaart.
  • Slegte skuld Soms is hierdie soort skuld nodig, byvoorbeeld wanneer jy ’n motor koop. Dit is altyd beter om kontant te betaal, maar dit is nie altyd moontlik nie. Moenie die duurste motor koop nie. Kies liewer ’n goedkoper, tweedehandse of demonstrasiemodel. Verstaan die implikasies van die kontrak en hoeveel jy sal terugbetaal – insluitend enige ballonbetalings.
  • Lelike skuld Dit is wanneer jy goed op krediet koop wat jy nie kan bekostig of regtig nodig het nie. Dit is ’n algemene slaggat waarin talle Suid-Afrikaners trap. Ons koop ’n paar ontwerperskoene of ’n grootskerm-TV op krediet en betaal dan maande of jare lank daaraan af. Eindelik betaal ons vanweë die rente veel meer vir die skoene as wat dit gekos het.

  • TOPWENK: Stop en dink vyf minute lank na voor jy iets koop. Vra jou af: hoekom wil ek dit koop? Is dit goed vir my ego, of sal dit my lewe verryk? Hoeveel sal dit regtig kos? Sal ek iets anders moet prysgee?
  • DOEN DIT: Spaar liewer as om skuld te maak en geniet die voordeel van saamgestelde rente. Dit beteken jy “verdien rente op rente”. Dit laat jou geld groei (as dit in ’n spaarplan is) of kwyn (as jy skuld afbetaal).

Sanlam is ’n gelisensieerde verskaffer van finansiële dienste.