Dit gaan Suid-Afrika se TV-landskap verander.

Hier is bekostigbare kykstof vir mense wat tot nou maar met die SABC en e.tv tevrede moes wees – en kompetisie vir DStv.

Ja, hier is gesonde mededinging, en die wenners is ek en jy.

So praat mense oor TopTV, die nuweling in Suid-Afrika se betaal-TV-bedryf, wat voorheen na party mense se smaak maar bra keusebeperk was.

“Suid-Afrikaners wat tussen R99 en R249 per maand kan bekostig, sal toegang hê tot wêreldklas-TV-vermaak oor alle genres heen, insluitend nuus, kennis, flieks, gesins-, kinder-, musiek-, sport- en kultuurprogramme,” sê Vino Govender, uitvoerende hoof van TopTV se beheermaatskappy, On Digital Media.

Een ding is seker: Hier in die wegspringblokke is TopTV inderdaad baie bekostigbaar. Dit was ons ervaring toe ons self een van die nuwe dekodeerders verrassend goedkoop gaan koop en laat installeer het (maar daar was teen saktyd nog ’n groot tekort aan hulle).

Jou aanvanklike kitsindruk is inderdaad ook dat TopTV beslis die lewe van mense wat nie betaal-TV gewoond is nie – en bygesê, nie veral sport wil kyk nie – kan opkikker.

TopTV se teikenmark is die 5,5 miljoen mense metTV’s wat nie DStv het nie, verneem ons van Melinda O’Connor, publisiteitsbestuurder. Daar was wel ook navrae van DStv-intekenare wat die geldknyp voel, en van dié wat nou

DStv én TopTV wil hê.

“Maar ons kyk eerder na mense wat nog al die jare nie betaal-TV-dienste gehad het nie,” sê Melinda. Hulle het nou ’n keuse buiten openbareTV – “en die verbruiker het reeds begin wen”.

Inderdaad, want DStv het nou ook onder meer ’n nuwe R99- boeket bekendgestel.

Wat sal jy sien op TopTV

As jy mik na die volledige TopTV-ervaring van R249 met al vier boekette – Variety (basiese boeket), Kids & Music, Entertainment&Knowledge en Ultimate Movies – kry jy onder meer kykstof van internasionale name soos Fox, Warner, Discovery, MGM, CBS en Disney.

Dit sal ses fliekkanale insluit, en kanale soos:

- Fox Entertainment (drama-, wetenskapsfiksie-, komedie- en animasiereekse en werklikheids- TV)

- Discovery

- Travel&LivingNews

- Setanta Africa (ligaklub- en internasionale sokkerwedstryde, boks en sportnuus)

- Fuel TV (avontuursport vir veral jonger kykers)

Daarbenewens het TopTV self kanale met plaaslike en internasionale inhoud vir Suid-Afrika verpak, insluitend TopOne (gesinsvermaak vir almal), TopMovies, Top Gospel, Top Crime en Top Learn.

Hoewel sommige vandie flieks wat op TopTV uitgesaai sal word, dalk reeds op DStv was, het TopTV ook sy eie “sterk verspreiders” soos Showtime, Fox FX (adrenalienbelaaide aksie en komedie vir veral mans) en Silver (indie- en kunsflieks).

Perfect Stranger (met Bruce Willis en Halle Berry), Ghost Rider en 8MM (Nicolas Cage), Vacancy (Kate Beckinsale), Spiderman III, Die Hard IV en Jakob the Liar (Robin Williams) is byvoorbeeld op Top Movies se Mei-program.

En op die MGM-fliekkanaalen Discovery Science; Natura (natuur-dokkies); Zee Cinema (Bollywood uit die boonste rakke, met die warmste divas); BBC World (een van enkele kanale wat DStv ook het); Fox News (met, vir sommige, ’n dalk te Amerika-gesentreerde nuusbenadering); Al Jazeera (vir ’n ander nuusperspektief, ook reeds op DStv); Black EntertainmentTV (verskeie genres, insluitend geselsprogramme, en gemik op veral swart kykers); CurrentTV (Al Gore se veelbesproke “nuwe media”-kanaal met onder meer nuus- en informatiewe bydraes deur kykers self, wel geredigeer); en Fine Living Network (kookkuns, reis, binneversiering, gesondheid).

Musiek- en sportkanale

TopTV bied ook omtrent agt musiekvideokanale met van pop, hip-hop en R&B tot rock, klassieke uitvoerings en musiek uit Nigerië.

Met SuperSport wat koning kraai betreffende rugby- en krieketdekking en ook plaaslik PSLsokkerregte bekom het, is sport nie TopTV se sterk punt nie. Tog het hy kanale soos Eurosport.

Op die indie-fliekkanaal Silver sien ons nou die aand byvoorbeeld die Britse filmverwerking van die klassiekeThomas Hardyverhaal The Woodlanders. En American Rhapsody (Scarlett Johansson) en die skerp komedie I’m Reed Fish is glo Mei-hoogtepunte.

Die kanaal saai ook goeie dokumentêre prente uit.

Top Movies+2 en Top Movies+ 24 bied bloot heruitsendings van flieks wat mense op Top Movies misgeloop het. Die fliekkanale het dae ná die bekendstelling van die diens ook nog nie naastenby aaneen uitgesaai nie.

Tog behoort fliekliefhebbers genoeg ontvlugting op TopTV te vind. Fox FX (hoofsaaklik reekse, al is dit in die Ultimate Movies-boeket) moes nog begin uitsaai toe ons ingeskakel het, maar het flitse gewys uit ’n nuwe seisoen van The Office, die misdaad- dramareeks Underbelly en ’n nuwe Kojak met Ving Rhames (“Kojak is back and he’ black”).

En op Fox Entertainment kry jy trefferreekse soos Most Haunted, Fear Factor, Seinfeld, The Simpsons, Grey’s Anatomy en Stargate. Daar is ook Fox Retro vir diegene wat nostalgies raak oor die oorspronklike Kojak,

Starsky&Hutch, Hart to Hart, Fame, Magnum P. I . en M*A*S*H.

Investigation Discovery bied dokkies oor misdaad- en forensiese ondersoeke.

Natura is nou nie National Geographic nie, maar behoort diereliefhebbers te vermaak.

Kindervermaak

Betreffende kindervermaak, het TopTV wel nie die Disneykanaal nie, maar sal hulle tog soms Disney-programme uitsaai.

BabyTV, geskep saam met kundiges, is een van die eerste advertensievrye internasionale kanale vir babas en kleuters. Jim Jam is nog ’n kanaal vir voorskoolse kinders.

En Kids Co, hoewel nie met al die treffers van ’n Cartoon Network nie, het gewilde animasie soos Dennis the Menace, Inspector Gadget, The Wiggles, Sabrina: The Animated Series en Tales from the Cryptkeeper.

Top Junior bied ook skaflike animasie soos Flipper en Lopaka, oor ’n dolfyn en ’n seun, en tekenprente.Kykstof soos Maya the Bee word ook weer daar afgestof.

Hoe kry jy dit, en wat kos dit?

- Jy koop ’n dekodeerder, afstandbeheerder en slimkaart by een van die aangewese winkelsvir R499.

- Bel dan die TopTV-oproepsentrum om ’n installeerder na jou te stuur.

- Hy daag met skottel en dies meer op en kry jou diens aan die gang.

- Jy betaal niks meer nie, en TopTV belowe dit sal binne 48 uur gedoen word.

- Jy betaal dan maandelikse intekengeld van R99 tot R249 na gelang van jou boeket.

- Jy kan jou diens enige tyd kanselleer of vir ’n maand of twee opskort as die geld knyp, en dan hervat.

Lees ook meer in die Huisgenoot van 13 Mei 2010, waar ons ook vertel van DSTV se nuwe boekette.