Dis amper weer sulke tyd. Maar hier agter die skerms waar ons land se eie glansmense vere regskud om hierdie naweek die verhoog aan die brand te sing en dans wanneer Skouspel Plus by die Grand West Casino in Goodwood afskop, is almal nog koel en kalm...

Hulle is nogal hardwerkend, sê Willie Venter, die verhoog-regisseur wat moet sorg dat alles op die verhoog klopdisselboom verloop.

"Nee wat, ek sukkel nie baie nie," sê die man wat bekend is vir sy strengheid.

In die choreografie-kringe gons dit hoeka dat daar net een manier is om dinge op die planke te doen en dis die Willie-manier. Hieroor lag hy kop-agteroor-lekker.

"Ja, ek is streng, maar hier was dit darem nog nie nodig nie. Ek hoef nie te raas nie."

Sy popgroep On Cue gaan ook vanjaar tydens die Tiener Talent-kompetisie hul ding doen. Dié vierstuks met die sanger Winray Fortuin as voorbok gaan sake sommer behoorlik skop gee met hul Michael Jackson-passies.

Hul liedjie Muchas Gracias saam met die legendariese Sonja Heroldt is reeds ‘n treffer op die radiostasies. ``Die harde werk het beslis vrugte afgewerp. Ek is baie trots op hulle,’’ sê Willie breëbors.

Die sangers Mathys Roets en Bobby van Jaarsveld het darem ‘n kansie afgeknyp om ‘n grappie of twee agter die skerms te maak.

"Bobby is mos eintlik my rolstoeloperateur; hy lyk sommer fiks," spot die sanger wat byna ‘n jaar gelede die gebruik van sy bene in ‘n motorfietsongeluk op pad na die KKNK in Oudtshoorn verloor het. Sy nuwe CD, Droomvrou, is nou op die rakke en hy sing net liedjies met vrouename. "Soos Caroline, Suzanne, Lisa,"  vertel Mathys en voeg by:  "Dan kan die mense sien ons manne is darem nie almal oppervlakkig nie."

Vanjaar is dit vir hom die lekkerste om weer die verhoog met al sy musiek-pêlle te kan deel.

"Laurika se aura is net iets besonders. Jy kan dit aanvoel en dis net ongelooflik om deel daarvan te wees."

Die nimlike Bobby bloos bloedrooi as jy oor sy silwerdoek-soene met Lika van der Bergh uitvra. Hulle speel in die fliek Liefling wat binnekort bekendgestel word.

"Bloos ek regtig? Kan jy dit sien," laat hy verleë hoor. ``Die fliek is ‘n musiekblyspel en ek belowe dit sal jou nie een keer verveel nie."

Dis vanjaar Nomfusi Gotyana (24) se eerste deelname aan ons gesogte glansvertoning en as die petite sanger haar mond oopmaak, kan g’n mens glo daai stem kom uit so ‘n klein lyfie nie.  G’n wonder sy is ook gekies om by die openingsaand van hotelmagnaat Sol Kerzner se nuwe spoghotel in die Kaapse Waterfront The One & Only te sing nie – nogal in die geselskap van Oprah-hulle en sangers soos Mariah Carey.

"Ek het daai aand so hard Mariah se handtekening probeer kry. Sy was gaaf, maar daai lyfwagte van haar... Sjoe, hulle was groot."

Ja-nee teen Mariah se fris sterkmanne sou Nomfusi beslis nie ‘n kat se kans gestaan het nie...