Model: Opel Corsa 1,4 Turbo Enjoy

Kaapse kobra. Dit is die eerste ding waaraan ek dink toe ek die Opel Corsa 1,4 Turbo Enjoy (in hierdie geval so ’n gifgeel nommertjie) onder hande kry. Maar dis toe ek die Turbo onder die voete kry dat ek besef: Hierdie motor kan ekovriendelik wees, maar dit maak hom nie vervelig nie. Dis ’n blitsgiftige kobra dié.

Die blits in die enjin is daaraan te danke dat dit turboaangedrewe is. Dit beteken waar ’n enjin voortdurend ’n petrolinspuiting ontvang soos jy die pedaal trap en letterlik klein petrolontploffings veroorsaak, vuur die turbo die ontbrandingsproses nog verder aan deur meer suurstof in die enjin se ontbrandingskamer te blaas.

Die turbo-ondersteuning maak die motor kragtiger en vinniger, en glo my, ’n mens kan lag-lag 180 km haal sonder om enigsins hard te probeer – glad nie sleg vir ’n 1,4 L-enjin nie! Ek het al met 1,6 L-motors gery wat dit net met ’n groot geraas en geblaas sou regkry.

Kom ons praat gou syfers: Die 1,4 L-enjin lewer 88 kW krag tussen 4 000 en 6 000 r/min. en wringkrag van 175 Nm wat tussen 1 750 en 4 750 r/min. gelewer word.

Wat ek ervaar het, is dat die Corsa Turbo vinnig wegtrek. As jy daarvan hou om die motor se toere op te jaag om spoed op te tel, gaan jy mal wees oor hierdie gifvinnige Corsa.

Opel Corsa

Die Corsa gaan ook vinnig en veilig om die draaie. Ek het die motor se brandstofverbruik suinig genoeg gevind (volgens General Motors is die amptelike brandstofverbruik 5,5 L/100 km). Bydraend tot die lae verbruik is die standaard-stopfunksie: Wanneer jy by ’n verkeerslig stilhou, skakel die enjin outomaties af en eers weer aan wanneer jy die koppelaarpedaal intrap om gereed te maak vir wegtrek.

Aan die binnekant is die Corsa Turbo Enjoy toegerus met alles wat jy nodig het vir ’n gemaklike, veilige rit. Behalwe vir ABS-ondersteunde remme en elektroniese remkragverspreiding (ERV) word die insittendes ook beskerm deur lugsakke.

Ek het nie baie van die klankstelsel gehou nie, want die klank was vir my dowwerig en nie so helder en hard soos wat eintlik by die Turbo Enjoy sou pas nie. Ook het ek die inligtingstelsel, wat onder meer ’n roeteaanwyser bevat, verbruikersonvriendelik gevind. Die feit dat die roeteaanwyser ’n eie, dik boekie vol aanwysings benodig, bewys my punt.

Wat geriefsfunksies betref, het die motor ’n USB-sok, ’n afstandbeheerde slotmeganisme sowel as Bluetooth. Die kattebakruimte is genoeg vir stadsgebruik. Die chroombedekte uitlaatpyp en 16-duim-allooiwiele wys hierdie Corsa het oemf.

Die prys van die 1,4 Corsa Turbo Enjoy is R194 400 en dit sluit ’n vyfjaar/120 000 km-waarborg en ’n driejaar/60 000 km-diensplan in.

Die naam Corsa 1,4 Turbo Enjoy is gepas vir die motor; dis genot op vier wiele en het omtrent die Kaapse kobra in my uitgebring.

Erla Diedericks

Opel Corsa