[caption id="attachment_79073" align="aligncenter" width="600"]Foto: Simply Sensational Foto: Simply Sensational[/caption]

Liza Brönner se jongste enkelsnit, Sit jou Hand op jou Mond, is pas uitgereik.

“Ek het die liedjie geskryf om mense te motiveer om vir die boelies in hul lewe te sê: Sit jou hand op jou mond,” vertel Liza.

Sy sê deur die liedjie te skryf, het sy beter perspektief gekry. “Ek het gevoel dis tyd dat ek hierdie aspek aanraak,” vertel Liza.

Sy meen die meeste mense loop die een of ander tyd deur onder iemand wat hulle emosioneel afknou. “Wanneer jy jonk is, kan mense se woorde ’n groot uitwerking op jou hê.”

Liza sê mense besef nie aldag hoe ander mense se woorde en mening hulle beheer nie, veral tydens hul tienerjare. “As ’n mens jou altyd steur aan wat ander sê en dit glo, sal jy later jou lewe en drome daarvolgens aanpas.”

Sy het self op skool onder afknouery deurgeloop. “Ek is gespot oor my voorkoms en daar was selfs ’n keer of wat dat meisies my sommer vir geen rede wou slaan.

“Ek dink wat my die meeste geraak het, was dat mense altyd iets te sê gehad het oor my keuse om te sing vir ’n loopbaan,” vertel Liza. “Hier het ek veral opdraande gekry van onderwysers wat gereken het dat dit dom was en dat ek nooit ’n sukses daarvan sou kon maak nie.”

Sy sê dit gebeur ongelukkig dat ’n mens ander se neerhalende woorde glo en dan aan jou drome twyfel. “Ek het regtig op ’n punt in my lewe geglo dat ek net nie goed genoeg is vir enigiets nie,” onthou sy.

“Met hierdie liedjie wil ek eintlik vir almal sê dat hulle goed genoeg is,” sê Liza, “en dat dit nooit, ooit saak maak wat mense van jou dink of sê nie.”

Sy sê mense moet in hulself glo. “Weet dat God jou aanvaar net soos jy is. Daardie aanvaarding sal jou die krag gee om op te staan teen boelies en die lewe tree vir tree aan te pak.”

Gaan na www.lekrmusic.co.za om na die liedjie te luister. Die eerste 100 Huisgenoot-weblesers kan die liedjie verniet aflaai. Klik op die skakel, kies “coupon” by die betalingsopsie en tik die sleutelwoord “Huisgenoot” in.