Kim Kardashian se assistent het na bewering haar motor ter waarde van R3,3 miljoen beskadig.

Die 33-jarige moes opdok om die verfskade aan haar swart Rolls Royce Phantom Series II te herstel nadat ’n werknemer oor die naweek per ongeluk ’n posbus gestamp het.

Die assistent het glo Kim se luukse motor uit haar oprit probeer trek toe sy die skade aanrig. Die motor het ’n groot stamp en ’n paar krapmerke op die agterpaneel opgedoen.

Maar volgens TMZ.com gaan Kim se assistent nie die R220 000 se skade self betaal nie; die donkerkopskoonheid gaan dit dek.

Intussen blyk dit Kim het ook ander dinge wat haar besig hou; sy het haar dogter, North, se eerste verjaardagpartytjie beplan.

Die Keeping up with the Kardashians-ster en haar man, Kanye West (37), het Saterdag ’n partytjie gereël, Kidchella, wat inspirasie put uit die Coachella-musiekfees.

Die pasgetroudes het ’n reeks aktiwiteite gereël, onder meer gesig verf, hare vleg, tydelike tatoes en mallemeuleritte. Hulle het ook wigwamme gehad vir gaste om in te ontspan.

Daar was ook stalletjies, piekniekbanke, verhoë en springkastele. Die partytjie is gehou by Kim se suster Kourtney se huis in Calabasas, Kalifornië.