SY WAS veronderstel om soet buite saam met haar ouma te wag terwyl haar ma ’n oudisie voor Idols se streng paneel beoordelaars aflê. Maar Hannah Duvall (4) laat haar nie maklik keer nie.

Dit kon duisende TV-kykers sien toe sy iets reggekry het wat menige hoopvolle deelnemer haar sal beny – omRandall Abrahams, die beoordelaar met die giftong, te beïndruk.

En dít sonder om ’n noot te sing!

By ma Tracy (23) se woonplek in Red Hill, Durban, kan jy gou sien hoekom Hannah die hart van Idols se strengste beoordelaar laat vermurwe het. Toe die voordeur oopswaai, wil sy dadelik weet: “Wie is julle? Wat is jul name?” ’n Regte klein patroon.

Terwyl Tracy, die eintlike Idols-deelnemer, sap skink in die kombuis, kom vra Hannah ewe gasvry: “Wil julle dalk iets eet?”

Later begin sy ’n paar note op die klavier speel, so asof sy regmaak vir haar eie Idols-oudisie oor ’n paar jaar...