Die Chinese motorvervaardiger GWM het plaaslik ’n besige jaar gehad met talle nuwe planne en opwindende nuwe modelle.

So sluit GWM 2013 af met die bekendstelling van ’n nuwe sportnutsvoertuig, die H6. Dit volg kort op die hakke van GWM se oulike C20R-luikrugmodel wat in September hier sy opwagting gemaak het.

[post-slider]

Dit gaan meeding met sportnutsvoertuie soos die Hyundai iX35, Kia Sportage en Nissan X-Trail.

Die H6 se lengte is 4 640 en sy asafstand 2 680 mm, terwyl dit 180 mm se grondvryehoogte het en 17-duim-allooiwiele as standaard

Daar is ’n keuse van twee enjins: ’n 2,0 L-turbodiesel en ’n 1,5 L-turbopetrol, wat eers ’n bietjie later beskikbaar gaan wees.

Die turbodieselmodel ontwikkel 105 kW se krag en wringkrag is 310 Nm, terwyl ’n sesspoedhandrat krag na die voorwiele stuur. Volgens GWM is die gemiddelde brandstofverbruik 6,7 L/100 km.

Die 1,5 L-turbopetrol skop 105 kW en 210 Nm uit en het ook ’n sesspoedhandratkas. Hierdie model se gemiddelde brandstofverbruik is 8,5 L/100 km.

Daar is ’n rits geriefskenmerke as standaardtoerusting wat onder meer leerbekleedsel, ’n multimediastelsel met ’n raakskerm, Bluetooth, klimaatbeheer, kragstuur, ’n kamera vir as jy agteruit bestuur, parkeersensors agter en outomatiese hoofligte insluit.

Van die H6 se veiligheidskenmerke is dubbele lugsakke voor, ABS-remme met elektroniese remkragverspreiding in Isofix-kindersitplekankers. Daar is ook ’n monitor wat die banddruk meet.

Pryse

H6 2,0 TCI 4x2: R329 900

H6 1,5T 4×2: R294 900

Planne vir 2014

Volgende jaar gaan GWM sy modelreeks nog uitbrei met onder meer ’n sedan, die C50, en ’n kompakte oorkruistipe voertuig, die M4. GWM is ook ’n borg van die tweede seisoen van die gewilde kykNET-werklikheidsreeks Kokkedoor.