Avontuur-komedie.

Met Selena Gomez, Katie Cassidy, Leighton Meester.

Regie: Thomas Bezucha.

2011. 101 min.

13O.

Ons dink: 2/5

Grace (Gomez) gaan saam met haar beste vriendin (Cassidy) en moeilike stiefsuster (Meester) Parys toe. Toe hulle in ’n spoghotel beland, word Grace vir ’n ryk, hoogmoedige sosiale vlinder, Cordelia (ook gespeel deur Gomez), aangesien en hulle word Monte Carlo toe genooi vir ’n liefdadigheidsgeleentheid.

Tussendeur ontmoet hulle oulike ouens en raak verlief terwyl hulle die lewe in die hoë kringe terdeë geniet.

Plek-plek voel die fliek soos ’n uitgerekte episode van ’n Disney-program, maar al is Meester se karakter al een met ’n bietjie diepte, is al drie hoofkarakters sjarmant en snaaks.

Gomez vertolk die rol van die ryk sosiale vlinder veel beter as dié van die doodgewone meisie; dis jammer haar Cordelia-karakter speel nie in meer tonele nie.

Hou verby as jy sinies is en nie van voorspelbare eindes hou nie, maar as jy lus is vir skadelose ontvlugting, sal jy dit geniet. En die uitsig oor Parys vanaf die Eiffel-toring is pragtig.

Bonus: uitgesnyde tonele, kortflieks.

Volg Huisgenoot op Twitter.